తెలంగాణ ఉద్యోగులకు ఏడున్నర శాతం పీఆర్సీ ఇవ్వాలని బిశ్వాల్ కమిటీ సిఫార్సు చేసింది. దీనిపై ఉద్యోగ సంఘాలు భగ్గుమన్నాయి. అరవై శాతం కావాలని డిమాండ్ చేశాయి. కొన్ని ఉద్యోగ సంఘాలతో చీఫ్ సెక్రటరీ సోమేష్ కుమార్ చర్చించారు. కానీ ఉద్యోగ సంఘాలన్నీ కేసీఆర్తో తేల్చుకుంటామని ప్రకటించాయి. అంతే.. ఆ తర్వాత అంతా సైలెంటయిపోయారు. అటు కేసీఆర్ ఎప్పుడు ఫామ్ హౌస్ నుంచి ప్రగతి భవన్కు వస్తారో తెలియదు. ప్రగతి భవన్ నుంచి ఎప్పుడు ఫామ్హౌస్కి వెళ్తారో తెలియదు. ఎప్పుడు ఉద్యోగ సంఘాలతో సమావేశం అవుతారో క్లారిటీ లేదు. కానీ ఈ లోపు మాత్రం పుణ్యకాలం మాత్రం గడిచిపోతోంది. పీఆర్సీ ఇప్పుడల్లా లేదనే సంకేతాలను ప్రభుత్వం తాజాగా ఉద్యోగులకు పంపుతోంది.
ఉద్యోగులు ఊహించనంత పీఆర్సీ ఇస్తారని మంత్రి శ్రీనివాస్ గౌడ్ లాంటి వాళ్లు ఊరిస్తున్నారు. దీంతో ఉద్యోగులు.. కేసీఆర్ ఇస్తారని అనుకుంటున్నారు. పెద్దగా ఆందోళన కార్యక్రమాలకు పిలుపునివ్వడం లేదు. కానీ ఉద్యోగ సంఘాల ఈ నిర్లక్ష్యం వల్ల.. ప్రభుత్వం ఆ పిసరంత పీఆర్సీ ఇవ్వకపోయినా పోయిదేముందిలే అనుకుంటున్న సూచనలు కనిపిస్తున్నాయి. ఉద్యోగ సంఘాలతో చర్చలు జరిపేందుకు త్రిసభ్య కమిటీని నియమించారు. కొన్ని కమిటీతో సీఎస్ సోమేష్ నేతృత్వంలోని కమిటీ చర్చించింది. ఇక నివేదిక సమర్పించాల్సి ఉంది. కానీ… సమర్పించలేదు.
ఇంకా ఇతర సంఘాలతోనూ చర్చిస్తామని తాజాగా.. ప్రభుత్వ వర్గాలు సమాచారాన్ని లీక్ చేశాయి. చర్చల ప్రక్రియ పేరుతో ఆలస్యం చేస్తున్నారన్న అనుమానాలు ఉద్యోగుల్లో ప్రారంభమయ్యాయి. ఆర్టీసీ సమ్మె సమయంలో యూనియన్లను నిర్వీర్యం చేయడంలో ప్రభుత్వం సక్సెస్ అయింది. సమ్మెకు దిగిన కార్మికులతోనే యూనియన్ లీడర్లపై విమర్శలు చేసే విధంగా చేసి విజయవంతమైంది. ఇప్పుడు ఉద్యోగుల విషయంలోనూ అదే ప్లాన్ కేసీఆర్ అమలు చేస్తున్నారని ఉద్యోగ సంఘాల నేతలు అనుకుంటున్నారు. ఇప్పటికైతే ఉద్యోగ సంఘాల నేతల మధ్య రగడ సృష్టించి… టైం పాస్ చేస్తారని.. ఈ లోపు.. ఎమ్మెల్సీ ఎన్నికల నోటిఫికేషన్లు… ఇతర అడ్డంకులు వస్తాయని.. అందుకే.. పీఆర్సీ గురించి ఉద్యోగులు ఇప్పుడల్లా ఆశలు పెట్టుకోవడం అత్యాశేనన్న సెటైర్లు విపక్షాల నేతల నుంచి వస్తున్నాయి.
