తెలంగాణ ముఖ్యమంత్రి కేసీఆర్ పూర్తి స్థాయి బడ్జెట్ను అసెంబ్లీలో ప్రవేశ పెట్టనున్నారు. నిన్ననే ఆర్థిక మంత్రిగా ప్రమాణస్వీకారం చేసిన హరీష్ రావు.. మండలిలో బడ్జెట్ ప్రవేశ పెడతారు. ఈ సారి బడ్జెట్లో ఆర్థిక మాంద్యం ప్రభావం ఎక్కువగా కనిపించనుంది. బడ్జెట్ పై సీఎం కేసీఆర్ జరిపిన కసరత్తుల్లోనూ మాంద్యం మాటలే ఎక్కువగా వినిపించాయి. దీంతో… పెద్ద ఎత్తున వివిధ పథకాలకు కోతలు ఉండే అవకాశం ఉంది. పార్లమెంట్ ఎన్నికలకు ముందు … పూర్తి స్థాయి ప్రభుత్వం ఏర్పాటు చేసినప్పటికీ.. కేసీఆర్ ఓటాన్ అకౌంట్ బడ్జెట్నే ప్రవేశపెట్టారు. దాంతో ఇప్పుడు.. పూర్తి స్థాయి బడ్జెట్ ప్రవేశ పెట్టాల్సిన అవసరం ఏర్పడింది.
ఫిబ్రవరిలో ప్రవేశ పెట్టిన ఓటాన్ అకౌంట్ బడ్జెట్లో రూ.1,82,017 కోట్ల పద్దును ప్రతిపాదించారు. ఈ సారి ఈ లెక్కలో కనీసం.. రూ. 17వేల కోట్ల ను తగ్గించే అవకాశం ఉంది. రూ.లక్షా 65 వేల కోట్ల అంచనాలతో నే పూర్తిస్థాయి బడ్జెట్ కేసీఆర్ అసెంబ్లీలో ప్రతిపాదించనున్నారు. ఉదయం 11.30 గంటలకు శాసనసభలో బడ్జెట్ను ప్రవేశపెడతారు. ఆర్థిక మాంద్యం దేశంలోని అన్ని రాష్ట్రాలపై తీవ్ర ప్రభావం చూపుతోందని ముఖ్యమంత్రి భావిస్తున్నారు. ప్రజల్లో వస్తు, సేవల కొనుగోళ్ల శక్తి తగ్గి.. పన్నుల ఆదాయం తగ్గుతోందని ప్రభుత్వం అంచనాకు వచ్చింది.
మొత్తంగా ఓటాన్ అకౌంట్ బడ్జెట్తో పోల్చితే పూర్తి స్థాయి బడ్జెట్ను 8 నుంచి 12 శాతం వరకు కుదించడం ఖాయంగా కనిపిస్తోంది. రూ. 17వేల కోట్ల వరకూ కోత పడితే.. ఏ ఏ రంగాలకు కోత విధిస్తారన్నది అత్యంత కీలకంగా మారింది. ఇప్పటికే సంక్షేమ పథకాలకు.. కొన్ని నెలలుగా నిధులు అందడం లేదు. అభివృద్ధి పనుల పరిస్థితీ అంతే. రైతు బంధును పరిమితం చేస్తారన్న ప్రచారం జరుగుతోంది. ఈ క్రమంలో.. బడ్జెట్ లెక్కలు తగ్గిస్తే.. ఎవరెవరికి కోత పడబోతోందన్నది కీలకంగా మారనుంది.
