తేజ సజ్జా, కార్తీక్ ఘట్టమనేని కాంబినేషన్ లో ఓ చిత్రం రూపుదిద్దుకొంటున్న సంగతి తెలిసిందే. ఈ చిత్రానికి ‘మిరాయ్’ అనే టైటిల్ ఫిక్స్ చేసినట్టు తెలుగు 360 ముందే చెప్పింది. ఇప్పుడు అదే జరిగింది. ఈ సినిమాకు ‘మిరాయ్’ అనే టైటిల్ ఖరారు చేశారు. దీంతో పాటు గ్లింప్స్ కూడా విడుదల చేశారు. గ్లింప్స్లోని విజువల్స్.. ఈ సినిమాపై మరిన్ని అంచనాలు పెంచేశాయి. తేజ నుంచి మరో సూపర్ హీరో సినిమా రాబోతోందన్న సంగతి అర్థమైంది. పాన్ ఇండియా, పాన్ వరల్డ్ సినిమాల స్థాయికి తగ్గట్టే విజువల్స్ కనిపించాయి. అయితే ఇది 20 రోజుల్లో తీసిన ఫుటేజ్.
‘హనుమాన్’ సమయంలోనే `మిరాయ్` సెట్స్పైకి వెళ్లింది. కొన్ని రోజులు షూటింగ్ కూడా చేశారు. అయితే ఆ తరవాత తేజా సజ్జా `హనుమాన్`పై ఫోకస్ చేయడంతో ‘మిరాయ్’ని తాత్కాలికంగా పక్కన పెట్టారు. అది మంచికే అయ్యింది. `హనుమాన్` భారీ విజయాన్ని నమోదు చేసుకోవడంతో ‘మిరాయ్’ లెక్కలు మారిపోయాయి. కావల్సినంత బడ్జెట్ కేటాయించుకొనే వెసులు బాటు వచ్చింది. దానికి తగ్గట్టే.. స్టార్ కాస్ట్ కూడా మారింది. మంచు విష్ణు, దుల్కర్ సల్మాన్లాంటి వాళ్లు టీమ్ లో చేరారు. త్వరలోనే ‘మిరాయ్’ కొత్త షెడ్యూల్ మొదలు కానుంది. 20 రోజుల్లోనే గ్లింప్స్కి సరిపడేంత ఫుటేజ్ తీశాడంటే.. కార్తీక్ మామూలోడు కాదు. తన గత సినిమా ‘ఈగిల్’ బాక్సాఫీసు దగ్గర బోల్తా కొట్టినా, `మిరాయ్` గ్లింప్స్తో ఆ నెగిటివిటీ మొత్తం పోగొట్టేశాడు. 2025 ఏప్రిల్ 18న అంటే సరిగ్గా ఈరోజే `మిరాయ్` విడుదల కాబోతోంది.
