‘హనుమాన్’తో ఓ సూపర్ హిట్ తన ఖాతాలో వేసుకొన్నాడు తేజా సజ్జా. అంతకు ముందు ‘జాంబీ రెడ్డి’ లాంటి హిట్ తన ఖాతాలో ఉంది. ఓటీటీలో వచ్చిన ‘అద్భుతం’ కూడా ఓకే అనిపించుకొంది. ఇప్పుడు నిర్మాతలకు, దర్శకులకూ తనో మంచి ఆప్షన్. `హనుమాన్` తరవాత కార్తీక్ ఘట్టమనేని దర్శకత్వంలో ఓ సినిమా చేయబోతున్నాడు. ఈలోగా మరో కథకీ గ్రీన్ సిగ్నల్ ఇచ్చేశాడు.
‘ధమాకా’ దర్శకుడు నక్కిన త్రినాథరావు దర్శకత్వంలో తేజా సజ్జా ఓ సినిమా చేయడానికి అంగీకారం తెలిపాడు. ఈ చిత్రానికి బెజవాడ ప్రసన్న కుమార్ కథ, స్క్రీన్ ప్లే, సంభాషణలు అందిస్తున్నారు. ‘సామజవరగమన’లాంటి హిట్ చిత్రాన్ని అందించిన రాజేష్ దండా నిర్మాత. స్క్రిప్టు దాదాపుగా లాక్ అయిపోయినట్టే. నక్కిన స్టైల్ లో సాగే హిలేరియస్ కామెడీ ఎంటర్టైన్మెంట్ ఇది. సాంకేతికంగానూ అత్యున్నతంగా తీర్చిదిద్దడానికి ప్రయత్నాలు జరుగుతున్నాయి. సంక్రాంతి పండక్కి అధికారికంగా ఈ కాంబోని ప్రకటించే అవకాశం ఉంది.
