ఈ సంక్రాంతికి ‘హనుమాన్’తో ప్రేక్షకుల ముందుకు వస్తున్నాడు తేజా సజ్జా. ఆ తరవాత కూడా క్రేజీ ప్రాజెక్టే సెట్ చేసుకొన్నాడు. కార్తీక్ ఘట్టమనేని దర్శకత్వంలో తేజా నటిస్తున్నాడని, ఈ చిత్రాన్ని పీపుల్స్ మీడియా ఫ్యాక్టరీ నిర్మిస్తోందని తెలుగు 360 ముందే వెల్లడించింది. ఇప్పుడు ఈ ప్రాజెక్టులోకి మరో ఇద్దరు హీరోలు వచ్చారు. దుల్కర్ సల్మాన్, మంచు మనోజ్ కూడా తేజాతో చేతులు కలిపారు. ‘హనుమాన్’ కంటే భారీ బడ్జెట్ తో తెరకెక్కిస్తున్న చిత్రమిది. ఇప్పటికి కొంత మేర షూటింగ్ జరిగింది. ఇది కూడా సూపర్ హీరోకి సంబంధించిన కథే అని సమాచారం. మరి ఇందులో దుల్కర్, మనోజ్ల పాత్రలు ఎలా ఉంటాయన్నది ఆసక్తిని రేకెత్తిస్తోంది.
కార్తీక్ ఘట్టమనేని దర్శకత్వం వహించిన ‘ఈగల్’ ఈ సంక్రాంతి బరిలో నిలిచి, చివరి క్షణంలో తప్పుకొన్న సంగతి తెలిసిందే. ‘ఈగల్’ కంటే ముందే కార్తీక్ సైన్ చేసిన ప్రాజెక్ట్ ఇది. కార్తీక్కి ‘ఈగల్’ ఛాన్స్ రావడం, తేజా కూడా ‘హనుమాన్’తో బిజీ అవ్వడంతో కాస్త బ్రేక్ పడిగంది. ఇప్పుడు ‘ఈగల్’ ఫిబ్రవరి 9న విడుదలకు రెడీ అయ్యింది. ఆ తరవాతే… ఈ మల్టీస్టారర్ సినిమా మొదలయ్యే అవకాశాలు ఉన్నాయి.
