ఆడిలైట్ టెస్టులో రెండో రోజు పదిహేను వికెట్లు పడేసరికి.. ఇక మూడో రోజు ఎలా ఉంటుందో అని రాత్రంతా నిద్రలేకుండా టీమిండియా ఆటగాళ్లు ఆందోళన పడినట్లుగా ఉన్నారు. పిచ్ మీదకు బ్యాటింగ్కు వచ్చిన వారు వచ్చినట్లుగా వెనక్కి వెళ్లిపోయారు. చివరికి తొలి ఇన్నింగ్స్ ఆధిక్యం అంత స్కోర్ కూడా పది మంది కలిసి కొట్టలేకపోయారు. రెండో ఇన్నింగ్స్లో కేవలం 36 అంటే 36 పరుగులు చేశారు. టెస్టు చరిత్రలో ఇది నాలుగో అత్యల్ప స్కోరు. ఆట మొదలైన రెండో ఓవర్ నుంచే వికెట్లు నేర రాలడం ప్రారంభమయింది. హాజిల్వుడ్ ఐదు వికెట్లు, కమిన్స్ నాలుగు వికెట్లు పంచుకున్నారు.
హాజల్ వుడ్ ఎనిమిది పరుగులు మాత్రమే ఇచ్చాడు. ఒక్కరు కూడా రెండంకెల స్కోర్ నమోదు చేయలేదు. పిచ్ భయం ఆటగాళ్లను ఎంతగా భయపెట్టిందంటే.. చివరికి బ్యాట్స్మెన్ షమీ రిటైర్డ్ హర్ట్గా వెనుదిరిగాడు. మొత్తం 21 ఓవర్లు ఆడి చేసిన స్కోరు 36 పరుగులు. తొలి ఇన్నింగ్స్లో భారత్కు 53 పరుగుల ఆధిక్యం లభించడంతో ఆస్ట్రేలియా లక్ష్యం 90 పరుగులుగా తేలింది. భారత ఆటగాళ్లు అలా ఔటయ్యారు కాబట్టి.. నిజంగానే పిచ్ అంత ఘోరంగా ఉందేమో.. భారత బౌలర్లు కూడా చెలరేగిపోతారేమో అని ఆశ పడిన భారత అభిమానులకు నిరాశే ఎదురయింది. ఆస్ట్రేలియా ఆటగాళ్లు.. ఆడుతూ పాడుతూ 90 పరుగులు కొట్టేశారు. రెండు వికెట్లు కోల్పోయారు. మొత్తంగా తొలి టెస్టు రెండున్నర రోజుల్లోనే పూర్తయింది. టీమ్ఇండియా ఘోర పరాభవం చవిచూసింది. రెండో టెస్టు డిసెంబర్ 26న మెల్బోర్న్లో జరగనుంది.
ఆడిలైడ్ పిచ్.. పరుగులు చేయడానికి ఇబ్బందికరమైన పిచ్నే కానీ.. మరీ భయపడి వికెట్లు పారేసుకోవాల్సింత ఘోరమైన పిచ్ ఏమీ కాదు. కాస్త నిబ్బంరంగా ఉంటే.. పరుగులు అవే వచ్చేవి. తొలి రోజు భారత ఆటగాళ్లు అంతే ఆడారు. కానీ రెండో రోజు వికెట్లు పడిన తీరు చూసి.. మానసికంగా ఇబ్బందిపడిపోయారు. ఆ ప్రభావం నేరుగా ఓటమి దగ్గరకు తీసుకెళ్లింది.
