తెలంగాణ బీజేపీ ఇప్పుడు జోష్ మీద ఉంది. ఎంపీలుగా గెలిచిన వాళ్లు వచ్చే ఎన్నికల్లో అసెంబ్లీకే పోటీచేయాలని పట్టుదలగా ఉన్నారు. ఇప్పటికిప్పుడు వారు తమ కోరికల్ని వినూత్నంగా బయట పెడుతున్నారు. నిజామాబాద్ ఎంపీ అర్వింద్.. తాను ఆర్మూర్ నుంచి పోటీ చేస్తానని సవాల్ చేశారు. టీఆర్ఎస్ ఎమ్మెల్యే జీవన్రెడ్డిపై పోటీ చేస్తానని ఇప్పటికే బహిరంగంగానే అర్వింద్ప్రకటించారు. ఆర్మూర్ నియోజవర్గంలోటీఆర్ఎస్ నేతలు తమను అడ్డుకున్న విషయాన్ని చాలా పకడ్బందీగా వాడుకున్నారని బీజేపీలోనే అంతర్గతంగా చర్చ జరుగుతోంది.
బీజేపీ రాష్ట్ర అధ్యక్షుడు బండి సంజయ్ ఎప్పుడు పోటీ చేసినా ఓడిపోతున్నారు. కరీంనగర్ అసెంబ్లీకి పోటీ చేసి డిపాజిట్ కూడా కోల్పోయిన తర్వాత ఎంపీగా గెలిచారు. వచ్చే ఎన్నికల్లో ఆయన కరీంనగర్ నుంచి కాకుండా వేములవాడ నుంచి అసెంబ్లీకి పోటీ చేయాలనుకుంటున్నారు. ఎంపీ ఎన్నికల్లో వేములవాడ నుంచే అత్యధిక ఓట్లు వచ్చాయి. వేములవాడ నుంచి పోటీ చేస్తే సునాయాసంగా గెలవచ్చనే భావనలోసంజయ్ ఉన్నారు. అందుకే అక్కడ తరచూ పర్యటిస్తున్నారు.
కేంద్ర కేబినెట్ మంత్రిగా ఉన్నప్పటికీ కిషన్ రెడ్డి చూపు అసెంబ్లీపైనే ఉంది. వరుసగా ఎమ్మెల్యేగా గెలుస్తూ వస్తున్న కిషన్ రెడ్డి గత ముందస్తు ఎన్నిల్లో మాత్రం పరాజయం పాలయ్యారు. ఆ వెంటనే ఎంపీగా గెలిచారు. ఈ సారి అంబర్పేటలో మళ్లీ పోటీ చేయడం ఖాయమే. ఆదిలాబాద్ఎంపీ సోయం బాపూరావు కూడా ఆసిఫాబాద్ ఏరియాల్లో ఆదివాసీల ప్రాబల్యం ఎక్కువగా ఉండటంతో అక్కడి నుంచే బరిలోకి దిగాలనే యోచనలో ఆయన ఉన్నారు. ఢిల్లీ స్థాయి నేతలు అసెంబ్లీకి గురి పెడుతూండటంతో ఇక రాష్ట్ర నేతలు మాత్రం ఊరుకుంటారా..? ఎవరి నియోజకవర్గాలకు వాళ్లు కర్చీఫ్లు వేసుకుంటున్నారు.
