బాక్సాఫీసు ద‌గ్గ‌ర విజ‌య్ దేవ‌ర‌కొండ స్టామినా ఏంటో.. ‘గీత గోవిందం’తో మ‌రోసారి తెలిసొచ్చింది. తొలి రోజు వ‌సూళ్ల వ‌ర్షం కురిసింది. ఓ అగ్ర క‌థానాయ‌కుడితో స‌మానంగా తొలిరోజు వ‌సూళ్లు ద‌క్కాయి. విజ‌య్ సినిమా అంటే క‌ల‌క్ష‌న్ల‌కు ఢోకా ఉండ‌ద‌న్న విష‌యం ‘గీత గోవిందం’తో అర్థ‌మైపోయింది. `టాక్సీవాలా`కి కావ‌ల్సింది ఇలాంటి స్ఫూర్తే. `గీత గోవిందం` కంటే ముందే విడుద‌ల కావాల్సిన సినిమా ఇది. కానీ… ఏవేవో కార‌ణాలు చెబుతూ వాయిదా వేస్తూ వ‌చ్చారు. విఎఫ్ఎక్స్ స‌రిగా కుద‌ర‌లేద‌ని, అందుకే ఆల‌స్య‌మైంద‌ని నిర్మాత చెబుతున్నారు. అయితే.. దాంతో పాటు ఈ సినిమాకి బ‌జ్ లేక‌పోవ‌డం కూడా ఓ ప్ర‌ధాన స‌మ‌స్య‌గా మారింది. ఎందుక‌నో.. ‘టాక్సీవాలా’ జ‌నాల్లోకి చొచ్చుకెళ్ల‌లేక‌పోయింది. విజ‌య్ త‌ప్ప‌.. మ‌రో అట్రాక్ష‌న్ లేక‌పోవ‌డం ఈ చిత్రానికి ఓ ప్ర‌ధాన స‌మస్య‌. నిర్మాత‌లు కూడా ‘గీత గోవిందం’ హిట్ట‌యితే క్రేజ్ పెరుగుద్ది క‌దా అని ఎదురుచూశారు. ఇప్పుడు వాళ్ల ఆశ‌లు, అంచ‌నాలు ఫ‌లించాయి. ‘గీత గోవిందం’ సూప‌ర్ హిట్ టాక్ సంపాదించుకుంది. ఇప్పుడు ఈ సినిమా చూపించి ‘టాక్సీవాలా’ ని మంచి రేట్ల‌కు అమ్ముకునే ఛాన్సుంది. సో… ఒక‌ట్రెండు రోజుల్లో ‘టాక్సీవాలా’ రిలీజ్‌డేట్ బ‌య‌ట‌కు వ‌చ్చినా ఆశ్చ‌ర్య‌పోన‌వ‌స‌రం లేదు.