అభ్యర్థుల ఎంపిక కోసం.. కాంగ్రెస్ పార్టీ నానా తంటాలు పడుతోంది. రోజుల తరబడి చర్చలు జరుపుతోంది కానీ..తేల్చుకోలేకపోతోంది. ఇక్కడ మిత్రపక్షాలు మాత్రం కిందా మీదా పడిపోతున్నాయి. కూటమిలో ఉండాలో వద్దో తేల్చుకోవాలంటున్నాయి. కూటమిలో మిగతా పార్టీలకు దీపావళి నాటికి స్పష్టత వస్తుందని భావించినప్పటికీ సీపీఐ, తెలంగాణా జనసమితి సీట్ల వ్యవహారం తేలలేదు. కాంగ్రెస్ ప్రతిపాదించిన సీట్ల సంఖ్య, నియోజకవర్గాలపై సీపీఐ, టీజేఎస్ అసంతృప్తి వ్యక్తం చేస్తున్నాయి. మహాకూటమి సీట్ల సర్దుబాటు, టీజేఎస్ , సీపీఐకి ప్రతిపాదించిన స్థానాలపై కోదండరాం, సీపీఐ నేతలు హైదరాబాద్లో సమావేశమై చర్చించారు.
మహాకూటమిలో సీట్ల విషయంలో తెలుగుదేశం పార్టీ విషయంలో అసలు చర్చే లేదు. టీడీపీ తమకు ఏ స్థానాలిస్తారో ఎప్పుడో ఖరారు చేసుకుంది. అభ్యర్థుల్ని నిర్ణయించుకుంది. కొన్ని చోట్ల ప్రచారం కూడా ప్రారంభించింది. కానీ.. సీపీఐ, టీజేఎస్లు అడుగుతున్న స్థానాలకు, ఇస్తామన్న వాటికి… చాలా తేడా ఉంది. సీపీఐ తమకు 9 స్థానాలు ఇవ్వాలని కాంగ్రెస్కు ప్రతిపాదనలు పంపింది. మూడు సీట్లకు మించి ఇవ్వలేమని కాంగ్రెస్ చెబుతోంది. మంచిర్యాల, బెల్లంపల్లి, వైరా ఇస్తామని కాంగ్రెస్ అంటోంది. చాడ వెంకటరెడ్డి పోటీకి రెడీ అయిన హుస్నాబాద్ ఇవ్వకపోతే.. కూటమి నుంచి అయిన వెళ్లిపోవాలని సీపీఐ అనుకుంటోంది. ఈ విషయాన్ని సీపీఐ జాతీయ నాయకత్వం దృష్టికి తీసుకెళ్లింది. కాంగ్రెస్, సీపీఐ నేతల మధ్య పలు దఫాలుగా చర్చలు జరిగాయి. ఈ చర్చల్లో మూడు స్థానాలతో పాటు భవిష్యత్లో రెండు ఎమ్మెల్సీ స్థానాలు ఇచ్చేందుకు కాంగ్రెస్ హామీ ఇచ్చినట్లు తెలుస్తోంది.
మహాకూటమి సీట్ల సర్దుబాటు, సీపీఐ, టీజేఎస్కు కేటాయించే స్థానాలపై చర్చించేందుకు కోదండరాం సీపీఐ కార్యాలనికి వెళ్లారు. సీపీఐ జాతీయ ప్రధానకార్యదర్శి సురవరం సుధాకర్ రెడ్డి, జాతీయ నేత నారాయణ, రాష్ట్ర కార్యదర్శి చాడ వెంకట్రెడ్డితో ఆయన సమావేశమై పలు అంశాలపైన చర్చించారు. టీజేఎస్ 14 సీట్లు ఇవ్వాల్సిందేనని పట్టుబడుతోంది. 9 సీట్లకు మించి ఇవ్వలేమని కాంగ్రెస్ తేల్చి చెప్పింది. ఇచ్చే 9 స్థానాల్లోను తెజస కోరేసీట్లు కేవలం 5 మాత్రమే ఉన్నాయని.. రెండు కోరనివి, ఏమాత్రం బలంలేని మరో రెండు స్థానాలను ఇస్తామని చెప్పడంతో ఆ పార్టీ నేతల్లో తీవ్ర అసంతృప్తి నెలకొంది. కాంగ్రెస్లో సీట్ల పంచాయతీ తేలిన తర్వాత వీరి గురించి ఆలోచించే అవకాశం ఉంది.
