లోక్ సభ ఎన్నికల వేళ ఈవీఎం-వీవీప్యాట్కు సంబంధించి దాఖలైన పిటిషన్లపై సుప్రీంకోర్టు తీర్పు వెలువరించింది. వీవీప్యాట్ స్లిప్పులతో ఈవీఎం ద్వారా పోలైన ఓట్లను వందశాతం సరిపోల్చాలనే పిటిషన్లను సర్వోన్నత న్యాయస్థానం తిరస్కరించింది. జస్టిస్ సంజీవ్ ఖన్నా నేతృత్వంలోని ద్విసభ్య ధర్మాసనం ఈమేరకు తీర్పు వెలువరించింది.
ఈవీఎంల పనితీరుపై అనుమానాలు ఉన్నాయని, వీవీ ప్యాట్ స్లిప్ లను ఓటర్లకు అందించాలని పలువురు సుప్రీంకోర్టులో పిటిషన్ దాఖలు చేశారు.అలాగే, బ్యాలెట్ పద్దతిలోనే ఎన్నికలు నిర్వహించాలని అసోసియేషన్ ఫర్ డెమోక్రాటిక్ రిఫామ్స్ పిటిషన్ దాఖలు చేసింది. వీటన్నింటిపై విచారణ చేపట్టిన ధర్మాసనం ఈ పిటిషన్లను కొట్టివేస్తూ ఏకాభిప్రాయంతో తీర్పునిచ్చింది. అదే సమయంలో కేంద్ర ఎన్నికల సంఘానికి కీలక సూచనలు చేశారు.
ఈవీఎం-వీవీప్యాట్లకు సంబంధించి రెండు సూచనలు చేసింది సుప్రీంకోర్టు. సింబల్ లోడ్ తర్వాత ఎస్ఎల్యూలు సీల్ చేయాలని ఎన్నికల సంఘాన్ని ఆదేశించింది. దాని 45రోజులు భద్రంగా ఉంచాలని స్పష్టం చేసింది. ఫలితాల తర్వాత అభ్యర్థులు కోరితే ఈవీఎంల పరిశీలనకు అవకాశం ఇవ్వాలని సూచించింది. ఇంజినీర్ల బృందంతో ఈవీఎంలు పరిశీలించే అవకాశం కల్పించాలని…ఈవీఎంల పరిశీలనకు అభ్యర్థుల నుంచి 7 రోజుల్లో వినతి వస్తే పరిగణించాలని స్పష్టం చేసింది.
ఈ వెరిఫికేషన్ కు అయ్యే ఖర్చులను అభ్యర్థులే భరించాలని…ఒకవేళ ఈవీఎం ట్యాంపర్ అని తేలితే ఖర్చులు తిరిగి ఇవ్వాలన్నారు. కాగా, వీవీ ప్యాట్ పేపర్ స్లిప్ లను మాన్యువల్ గా లెక్కించడం చాలా సమయంతో కూడినదని.. అంతేగాక మానవ తప్పిదాలు జరిగే అవకాశం ఉందని సీఈసీ వాదనలు వినిపించింది.
