50 శాతానికి మించి రిజర్వేషన్లు ఖరారు చేస్తే.. ఖచ్చితంగా కోర్టు ఎన్నికలను నిలిపివేస్తుందని తెలిసి కూడా.. 59 శాతానికిపైగా రిజర్వేషన్లు ఖరారు చేసిన.. ఏపీ ప్రభుత్వం అనుకున్న ఫలితాన్ని ఎట్టకేలకు సాధించింది. 59 శాతం రిజర్వేషన్లు ఖరారు చేసి.. ఇచ్చిన జీవోను హైకోర్టు పట్టించుకోకుండా.. ఎన్నికలు నిర్వహించాలని ఆదేశించడంతో.. రెడ్డి సంక్షేమ సంఘం సుప్రీంకోర్టుకు వెళ్లింది. సుప్రీంకోర్టు.. ఏపీ ప్రభుత్వ జీవోపై స్టే విధించింది. ఫలితంగా ఎన్నికలు వాయిదా పడినట్లయింది. రిజర్వేషన్లు 50శాతానికి మించకూడదని సుప్రీంకోర్టు ఎప్పుడో రూలింగ్ ఇచ్చింది. గతంలో.. తెలంగాణ సర్కార్ ఇలా 50శాతానికి మంచి రిజర్వేషన్లు ఖరారు చేయడంతో కోర్టు అంగీకరించలేదు.

తర్వాత 50 శాతం లోపు రిజర్వేషన్లను ఖరారు చేసి ఎన్నికలు పూర్తి చేశారు. ఈ అనుభవం కళ్ల ముందు ఉన్నప్పటికీ.. ఏపీ సర్కార్ ఉద్దేశపూర్వకంగా మళ్లీ 59 శాతం రిజర్వేషన్లు ఖరారు చేసి.. ఎన్నికల నోటిఫికేషన్‌కు రంగం సిద్దం చేసుకుంది. ముందుగా..మండల, జిల్లా పరిషత్ ఎన్నికలు నిర్వహించాలనుకుంది. ఇప్పుడు ఎన్నికలు ఆగిపోయినట్లయింది. ఈ జీవోకు సంబంధించిన విచారణను హైకోర్టు నాలుగు వారాల్లో పూర్తి చేయాలని సుప్రీంకోర్టు ఆదే్శించింది. ఇప్పటికే హైకోర్టులో దీనికి సంబంధించిన పిటిషన్లు పెండింగ్‌లో ఉన్నాయి. 2010లో సుప్రీం కోర్టు రాజ్యాంగ ధర్మాసనం ఇచ్చిన తీర్పుకు అనుగుణంగానే ఎన్నికలు జరగాలని ధర్మాసనం స్పష్టం పేర్కొంది.

ఆంధ్రప్రదేశ్ లో ఎటువంటి ప్రత్యేక పరిస్థితులు లేవని తేల్చింది. ప్రస్తుతం ఏపీలో ఉన్న పరిణామాల నేపధ్యంలో ఎన్నికలు నిర్వహించడానికి ఏపీ సర్కార్ అంత ఆసక్తిగా లేదు. ఈ కారణంగా.. కేంద్రం నుంచి రావాల్సిన నిధులు రాకపోయినప్పటికీ.. ఎన్నికలు జరగకపోతేనే మంచిదని.. భావించి వివిధ కారణాలతో వాయిదాలు వేస్తూ వస్తున్నారు. ఇప్పుడు.. కోర్టు చిక్కుల్లో పడేలా చేశారన్న అభిప్రాయం ఏర్పడుతోంది.