ఓ హిట్టు కోసం ఆపసోపాలు పడిపోతున్నాడు సునీల్. కమెడియన్గా హ్యాపీగా నడిచిపోయిన సునీల్ కెరీర్.. హీరోగా మాత్రం కుదుపుల మయంగా సాగుతోంది. తఢాకా తరవాత.. సునీల్ హిట్టు మొహమే చూళ్లేదు. ఇప్పుడు సునీల్ ఆశలన్నీ ‘ఉంగరాల రాంబాబు’పైనే. ఫీల్ గుడ్ సినిమాలు తీసిన క్రాంతిమాధవ్ ఈ చిత్రానికి దర్శకుడు. టైటిల్ క్యాచీగా ఉంది. ఆపాత్ర… సునీల్కి భలే బాగా సూటైపోతుందన్న నమ్మకం కూడా కలుగుతుంది. దాంతో… ఈ సినిమాపై కాస్త ఇంప్రెషన్ పడింది. అయితే… షూటింగ్ దశలోనే చాలా కాలం ఉండిపోవడం, సినిమా పూర్తయినా విడుదలకు టైమ్ తీసుకోవడంతో ఆ హైపూ… తగ్గుతూ వచ్చింది. అయితే ఎట్టకేలకు నిర్మాతలకు కాస్త మూడ్ వచ్చి… ఈ సినిమాని విడుదల చేయడానికి రంగం సిద్ధం చేశారు. ఇప్పుడు ట్రైలర్ వచ్చింది.
నిమిషంన్నర సాగిన ఈ ట్రైలర్లో ఒక్క ఫ్రేమ్ కూడా కొత్తగా అనిపించలేదు. ఒక్క డైలాగూ పండలేదు. కమెడియన్ల గుంపు ఎక్కువగానే కనిపిస్తోంది. ఆ పంచ్లన్నీ… థియేటర్లోనే పంచాలని దర్శక నిర్మాతలంతా డిసైడ్ అయ్యారేమో. టైటిల్కి తగ్గట్టు చేతినిండా ఉంగరాలతో, రంగు రంగుల డ్రసులతో కనిపిస్తున్నాడు సునీల్. హీరోయిజం అనే ఎలిమెంట్ దాచేసి, ఈ సినిమాలో కామెడీ చేయడానికి ప్రయత్నించినట్టు అర్థం అవుతోంది. కాకపోతే.. సునీల్ నుంచి సరైన పంచ్ పడలేదు. కమర్షియల్ ఎలిమెంట్స్ బాగానే దట్టించినట్టు కనిపిస్తోంది. చివర్లో ప్రకాష్రాజ్ సునీల్నిచూపిస్తూ.. ‘ఎలా నచ్చాడమ్మా వీడు.. ‘ అంటాడు. ట్రైలర్దీ అదే పరిస్థితి. కనీసం సినిమా అయినా బాగుంటుందేమో చూడాలి.
