తెరపై సునీల్ కనిపించగానే పెదవిపై నవ్వు విచ్చుకుంటుంది. ఎందుకంటే సునీల్ చేసిన పాత్రలు అలాంటి. సునీల్ అంటే.. బంతి, బంకు శీను, శేషం.. సత్తి బాబు, పెందుర్తి బాబు.. ఇలా కడుపుబ్బా నవ్వించే పాత్రలే గుర్తుకువస్తాయి. అయితే హీరోగా టర్న్ తీసుకొని ..మళ్ళీ క్యారెక్టర్ రోల్స్ లోకి రీఎంట్రీ ఇచ్చిన తర్వాత కేవలం కామెడీనే కాకుండా విభిన్నమైన పాత్రల్లో కనిపించే ప్రయత్నం చేస్తున్నాడు సునీల్. ఈ క్రమంలో సునీల్ ని విలన్ గా మార్చారు సుకుమార్. పుష్ప సినిమాలో మంగళం శ్రీనుగా నెగెటివ్ షేడ్స్ ఉన్న రోల్లో కనిపించనున్నాడు సునీల్.
ఈ విషయాన్ని తెలియజేస్తూ ‘పుష్ప’ టీమ్ సునీల్ ఫస్ట్లుక్ పోస్టర్ని షేర్ చేసింది. ‘‘రాక్షసుడి పరిచయం.. మంగళం శ్రీనుగా సునీల్’’ అని ట్వీట్ చేశారు సుకుమార్. ఈ లుక్ లో సునీల్ మునుపెన్నడూ లేని విధంగా సీరియస్ లుక్లో కనిపించాడు. సునీల్ ని ఇలా చూడటం అందరికీ కొత్తగా వుంది. సునీల్ కి విలన్ ఇమేజ్ లేదు. డిస్కో రాజాలో విలనీ ట్రై చేసినా అది పెద్దగా వర్క్ అవుట్ కాలేదు. ఇప్పుడు సుకుమార్ ఏకంగా క్రూరమైన సునీల్ చూపించబోతున్నారు. మరి సునీల్ లో విలనిజం తెరపై ఎలా పండుతుందో అనే ఆసక్తి అందరిలోనూ వుంది.
