ఏంటి మళ్లీ ఇన్నాళ్లకు రాజమౌళి సునీల్ మీద దయ తలచాడా.. అపజయాలతో కొట్టుమిట్టాడుతున్న సునీల్ కి సాయంగా సూపర్ హిట్ సినిమా రాజమౌళి ఇవ్వదలచాడా అని ఏవేవో ఊహించేసుకున్నారంటే మీరు పప్పులో కాలేసినట్టే.. కమెడియన్ గా ఉన్న సునీల్ కాస్త హీరో అయ్యాడు.. అయితే ముందు సునీల్ భలే భలే అన్న ప్రేక్షకులే ఇప్పుడు బాపురే అనేస్తున్నారు. చివరగా భీమరం బుల్లోడు సినిమాతో కనిపించిన సునీల్ మళ్లీ ప్రేక్షకులముందుకు రాలేదు.

ప్రస్తుతం దిల్ రాజు నిర్మాణ సారధ్యంలో చేస్తున్న ‘కృష్ణాష్టమి’ మీదే చాలా ఆశలు పెట్టుకున్నాడు సునీల్. సినిమా దాదాపు పూర్తి కావొచ్చిన నేపథ్యంలో వంశీ ఆకెళ్ల సినిమా కూడా చేస్తున్నాడు సునీల్. ఆనంది ఆర్ట్స్ ప్రొడక్షన్ లో చేస్తున్న ఈ సినిమాకు టైటిల్ ముందు అగ్గిపుల్ల, సైనికుడు లాంటి పేర్లు వినపడ్డా ఇప్పుడు ఆ సినిమా టైటిల్ ‘జక్కన్న’ అని పెట్టారట.

రాజమౌళి సినిమాలో సునీల్ చేయడం కాదు రాజమౌళిని ముద్దుగా పిలిచే జక్కన్న సినిమాలో సునీల్ హీరోగా చేస్తున్నాడన్న మాట. ఇన్ని రోజులు ఖాళీగా ఉన్న సునీల్ ఇకనుండి వరుసెంట సినిమాలు చేసేందుకు రంగం సిద్ధం చేసుకుంటున్నాడు. ఆ దారిలోనే గోపీ మోహన్ తో కథా చర్చల్లో ఉండగా.. యువ దర్శకులతో కూడా కథ చర్చల్లో పాల్గొంటున్నాడట సునీల్. మరి రాబోయే సినిమాలతో అయినా సునీల్ తన అదృష్టాన్ని మార్చుకుంటాడేమో చూడాలి