సినిమా తరవాత సినిమా అన్నది మహేష్ బాబు పద్ధతి. ముందు నుంచీ ఇంతే. అయితే.. మిగిలిన హీరోలు అలా లేరు. ఓ సినిమా చేతిలో ఉండగానే, మరో సినిమాని లాక్ చేస్తున్నారు. మహేష్ మాత్రం ఓ సినిమా పూర్తయ్యాకే.. మరో సినిమా ఆలోచన చేస్తుండడంతో, తనకు తగిన దర్శకులు దొరకడం లేదు. ఉన్న వాళ్లతో సర్దుబాటు అయినా.. సూపర్ హిట్లు కొట్టగలుగుతున్నాడు. అదే. తాను కోరిన దర్శకులు వస్తే..?
అందుకే… మహేష్ ప్లాన్ మారింది. మిగిలిన హీరోల్లా దర్శకుల్ని లైన్ లో పెట్టుకుంటున్నాడు. ఆమధ్య మహేష్ – త్రివిక్రమ్ ల మధ్య భేటీ జరిగింది. వీళ్ల కాంబినేషన్లో ఓ సినిమా రావడం ఖాయం. లేటెస్టుగా సుకుమార్ తోనూ మహేష్ టచ్లోకి వెళ్లాడని సమాచారం. వీరిద్దరి కాంబోలో `నేనొక్కడినే` వచ్చింది. బాక్సాఫీసు దగ్గర ఆ ప్రయత్నం నిరాశ పరిచినా – క్రిటిక్స్ మనసుల్ని గెలుచుకుంది. సుకుమార్పై మహేష్ నమ్మకం సడల్లేదు. అందుకే సుక్కుతో మరో సినిమా చేయడానికి ప్లాన్ చేస్తున్నాడు. లాక్ డౌన్ సమయంలో మహేష్ కి సరిపడా ఓ లైన్ సిద్ధం చేశాడట సుకుమార్. `పుష్ఫ` అయ్యాక… విజయ్ దేవరకొండతో సుకుమార్ ఓ సినిమా చేయాలి. ఆ తరవాతే.. మహేష్ ప్రాజెక్టు ఉంటుంది. ఎంత కాదన్నా 2024 వరకూ ఈ కాంబోని చూడడం కష్టం. ఎందుకంటే.. మహేష్ కూడా అంత బిజీనే. కాకపోతే… సుకుమార్ ని లైన్లో పెట్టుకోవడం వల్ల.. తన తదుపరి సినిమాలకు దర్శకుల్ని వెదికే పని తప్పిందంతే.
