ఆశీష్ హీరోగా దిల్ రాజు బ్యానర్లో ‘సెల్ఫిష్’ అనే సినిమా చాలా కాలం క్రిందటే మొదలైంది. ‘రౌడీ బోయ్స్’ తరవాత పట్టాలెక్కిన సినిమా ఇది. ఆ తరవాత ఆశిష్ చేసిన మూడో సినిమా విడుదలైంది కానీ ‘సెల్ఫిష్’ రాలేదు. ఈ సినిమా స్క్రిప్టు పరంగా ఇబ్బందులు పడుతోందని, అందుకే ముందుకు తీసుకెళ్లలేకపోతున్నారని, సినిమా ఆగిపోయిందని, ఇక బయటకు రాదని వార్తలొచ్చాయి. అయితే ఈ సినిమాని మళ్లీ సెట్స్పైకి తీసుకెళ్లనున్నారు. ఆ బాధ్యత సుకుమార్ తీసుకొన్నారు.
‘సెల్ఫిష్’ సినిమాకు సుకుమార్ సహ నిర్మాతగా వ్యవహరిస్తున్నారు. సుకుమార్ రైటింగ్స్ కూడా ఇందులో భాగం పంచుకొంది. అందుకే ఈ కథకు రిపేర్లు చేసే బాధ్యత సుకుమార్ తీసుకొన్నారు. ప్రస్తుతం ఆయన ‘పుష్ప 2’ పనుల్లో బిజీగా ఉన్నారు. ‘పుష్ప 2’ అయ్యేంత వరకూ ‘సెల్ఫిష్’ని హోల్డ్ లో పెట్టారు. జనవరి నుంచి కనీసం ఓ నెల రోజులు సెల్ఫిష్ స్క్రిప్టు పై వర్క్ చేస్తారు సుకుమార్. ఆ తరవాత ఈ సినిమా మొదలవుతుంది. ఇప్పటికే 50 శాతం షూటింగ్ పూర్తయ్యింది. సుకుమార్ బిజీగా ఉండడంతో చాలామంది రైటర్లు ఈ కథని రిపేరు చేయడానికి ప్రయత్నించారు. దిల్ రాజు బ్యానర్లోని ఆస్థాన రచయితలంతా కూర్చుని ఈ స్క్రిప్టుని సరిదిద్దాలని చూశారు. కానీ సాధ్యం కాలేదు. సుకుమార్ చేయి పడితే తప్ప, ఈ ప్రాజెక్ట్ ముందుకు కదలదని భావించిన దిల్ రాజు, సుకుమార్ వచ్చేంత వరకూ ఈ ప్రాజెక్టుని హోల్డ్ లో పెట్టారు.
