రేపే రాజుగారి గది 2 ప్రేక్షకుల ముందుకు రాబోతోంది. ముందు ఇది హారర్ కామెడీ సినిమా అనుకొన్నారు. వాటితో పాటు.. ఎమోషన్ డ్రామా ఉంటుందని, ఫ్యామిలీకీ నచ్చే అంశాలున్నాయని చిత్రబృందం చెబుతోంది. వీటితో పాటు ఇప్పుడో కొత్త యాంగిల్ బయటపడింది. ఇటీవల సంచలనం రేపిన ‘సుచీ లీక్స్’ లాంటి యాంగిల్ ఈ సినిమాలో ప్రస్తావించబోతున్నారు. ఈ విషయాన్ని సమంతే చెప్పింది. సుచీ అనే పేరు తీసుకురాలేదు గానీ…. `లీక్స్` అంటూ వచ్చిన వీడియోలు రేపిన సంచలనం చుట్టూ ఈ సినిమా తిరగబోతోందని అర్థమైంది. ఆ వీడియోలు చూసిన వాళ్లకు, షేర్ చేసిన వాళ్లకు, పంపిన వాళ్లకు ఈ సినిమాలో తన పాత్ర ఓ మెసేజ్ ఇవ్వబోతోందని సమంత చెప్పేసింది. సో… సుచీలీక్స్ లాంటి వివాదం ఈ సినిమాలో కనిపించబోతోందన్నమాట.
రాజుగారి గది 2లో సమంత లా స్టూడెంట్గా కనిపించబోతోంది. చాలా సెన్సిటీవ్ అయిన సమంత ఆత్మహత్య చేసుకోవాల్సిన పరిస్థితులు వస్తాయట. దానికి కారణం.. సుచీ లీక్స్ లాంటి వ్యవహారమే అని తెలుస్తోంది. క్లైమాక్స్ లో అమ్మాయిల గురించి సమంత చెప్పే డైలాగులకు క్లాప్స్ కొట్టడం ఖాయమంటోంది చిత్రబృందం. ఆయా సన్నివేశాల్లో సమంత గ్లిజరిన్ కూడా వాడలేదట. సుచీ లీక్స్ వల్ల ఇబ్బంది పడిన అమ్మాయిల్ని తలచుకొంటూ ఆ పాత్రలో లీనమైపోయి నటించిందట. మరి ఆ సన్నివేశాలు ఏ స్థాయిలో పండాయో చూడాలి.
