‘గేమ్ ఛేంజ‌ర్‌’ త‌ర‌వాత రామ్ చ‌ర‌ణ్ చేయ‌బోయే సినిమా ఏమిటి? ఎవ‌రితో అనే చ‌ర్చ బాగా న‌డుస్తోంది. సుకుమార్ తో మ‌రోసారి చ‌ర‌ణ్ ఓ సినిమా చేస్తాడ‌ని గ‌ట్టిగా ప్ర‌చారం జ‌రుగుతోంది. అది దాదాపుగా ఖాయంగానే క‌నిపిస్తోంది. అయితే ఇప్పుడు స‌డ‌న్‌గా మ‌రో పేరు బ‌య‌ట‌కు వ‌చ్చింది. రామ్ చ‌ర‌ణ్ ఈసారి యాక్ష‌న్ కొరియోగ్రాఫ‌ర్లకు ఛాన్స్ ఇవ్వ‌బోతున్నాడ‌ని ఇన్ సైడ్ వ‌ర్గాలు గ‌ట్టిగా చెబుతున్నాయి. వాళ్లే.. అన్బ‌రివ్‌. వీళ్లు మ‌న రామ్ ల‌క్ష్మ‌ణ్‌లా క‌వ‌ల సోద‌రులు. త‌మిళ‌నాట చాలా సూప‌ర్ హిట్ చిత్రాల‌కు యాక్ష‌న్ కొరియోగ్రఫీ చేశారు. కేజీఎఫ్‌, లియో, విక్ర‌మ్ త‌దిత‌ర చిత్రాల‌కు ప‌ని చేశారు. చాలా కాలం నుంచి ద‌ర్శ‌క‌త్వం వైపు రావాల‌ని ఆశిస్తున్నారు. విజ‌య్‌, క‌మ‌ల్ హాస‌న్ లాంటి వాళ్ల‌కు క‌థ చెప్పారు. ఇప్పుడు రామ్ చ‌ర‌ణ్ కి కూడా ఓ క‌థ వినిపించార‌ని టాక్‌.

శంక‌ర్ ద‌ర్శక‌త్వంలో రామ్ చ‌ర‌ణ్ ‘గేమ్ ఛేంజ‌ర్‌’ చేస్తున్నాడు. ఈ చిత్రానికి అన్బ‌రివ్ సోద‌రులే.. యాక్ష‌న్ కొరియోగ్రాఫర్స్‌. ఈ షూటింగ్ స‌మ‌యంలోనే చ‌ర‌ణ్ కు క‌వ‌ల సోద‌రులు ఓ క‌థ వినిపించార‌ని తెలుస్తోంది. అది చ‌ర‌ణ్‌కు బాగా న‌చ్చింద‌ని, ఈ క‌థ‌పై చ‌ర‌ణ్ ఆస‌క్తి చూపిస్తున్నాడ‌ని తెలుస్తోంది. ఈ సినిమాని ఎప్పుడు చేస్తాడో తెలీదు కానీ, క‌చ్చితంగా ఈ యాక్ష‌న్ కొరియోగ్రఫ‌ర్ల తో చ‌ర‌ణ్ ఓ సినిమా చేయ‌డం ఖాయ‌మ‌ని తెలుస్తోంది. సుకుమార్ ఇప్పుడు పుష్ష 2తో బిజీగా ఉన్నాడు. అది అవ్వ‌గానే.. చర‌ణ్ సినిమా మొద‌లెడితే ఓకే. అలా కాకుండా ‘పుష్ష 3’ కూడా ఫినిష్ చేయాల‌నుకొంటే మాత్రం ఆ గ్యాప్ లో చ‌ర‌ణ్ ఓ సినిమా చేయాల్సి ఉంటుంది. అందుకే చ‌ర‌ణ్ కూడా ముందు జాగ్ర‌త్త చ‌ర్య‌గా… కొన్ని క‌థ‌ల్ని వింటున్నాడ‌ట‌.