‘ఈశ్వర్’ సినిమాతో హీరోయిన్గా మెరిసింది శ్రీదేవి. ఆ సినిమా వచ్చి 22 ఏళ్లు అయ్యింది. విజయ్ కుమార్ తనయురాలిగా తనకు వైల్డ్ కార్డ్ ఎంట్రీ దొరికినప్పటికీ, హీరోయిన్గా సక్సెస్ కాలేకపోయింది. చాలా కాలంగా శ్రీదేవి కనిపించడం లేదు. ఇప్పుడు మళ్లీ రీ ఎంట్రీ ఇచ్చింది. అది కూడా హీరోయిన్గా.
శ్రీదేవి వయసు ఇప్పుడు 38 ఏళ్లు. ఈ వయసులో అక్క, వదిన, అత్త పాత్రలే చేస్తుంటారు. కానీ శ్రీదేవికి మళ్లీ హీరోయిన్గా ఛాన్స్ దొరకడం అరుదైన సంగతే. నారా రోహిత్ హీరోగా ‘సుందరకాండ’ చిత్రం రూపుదిద్దుకొంది. ఈ సినిమాలో శ్రీదేవినే హీరోయిన్. టీజర్లో శ్రీదేవిని చూసి అంతా షాక్ అయ్యారు. తనని ఎవరూ పోల్చుకోలేకపోయారు. కాస్త పరిశీలనగా చూస్తే తప్ప శ్రీదేవి అని తెలియడం లేదు. నారా రోహిత్ టీమ్ ఏరి కోరి హీరోయిన్ గా శ్రీదేవిని ఎంచుకోవడం అందరినీ ఆశ్చర్యపరుస్తోంది. 40 ఏళ్లు వచ్చినా పెళ్లికాని పాత్రలో నారా రోహిత్ ఈ సినిమాలో నటిస్తున్నాడు. తన వయసుకి తగ్గ కథానాయికని వెదికి పట్టుకోవడానికి చిత్రబృందం బాగా కష్టపడింది. వాళ్ల ప్రయాణం.. శ్రీదేవి దగ్గర ఆగింది. ఈ ఇన్నింగ్స్ లో శ్రీదేవి మరిన్ని సినిమాలు ఒప్పుకొందని తెలుస్తోంది. అయితే అందులో హీరోయిన్గా చేస్తున్న సినిమా ఇదొక్కటే. ఈ సినిమా కాస్త సక్సెస్ అయితే, భవిష్యత్తులో ఫేడవుట్ అయిపోయిన హీరోయిన్లు మళ్లీ.. హీరోయిన్ పాత్రలు చేయడానికి ధైర్యం చేస్తారనిపిస్తోంది.
ఓ వైల్డ్ ఫాంటసీ పాయింట్ తో ‘సుందరకాండ’ సినిమా చేస్తోంది చిత్రబృందం. ఇలాంటి కథ ఇప్పటి వరకూ ప్రపంచ సినిమా చరిత్రలోనే రాలేదంటూ… స్టేట్మెంట్లు పాస్ చేస్తున్నారు. మరి అంత గొప్ప కథేమిటో, ఆ వైల్డ్ ఫాంటసీ ఏమిటో తెలియాలంటే ఇంకొంత కాలం ఆగాలి.
