చిరంజీవి – వశిష్ట కాంబినేషన్లో `విశ్వంభర` రూపుదిద్దుకొంటున్న సంగతి తెలిసిందే. త్రిష కథానాయిక. ఈ చిత్రంలో ఓ ప్రత్యేక గీతం ఉంది. అందు కోసం ఓ కథానాయిక కావాలి. ఈ ఆఫర్ శ్రీలీల వరకూ వెళ్లిందని టాక్. అయితే… ఆమె సున్నితంగా తిరస్కరించిందని సమాచారం. ”ఐటెమ్ సాంగులు చేసే ఉద్దేశం లేదు” అంటూ ఈ ఆఫర్ ని వదులుకొందట. శ్రీలీల హీరోయిన్ గా స్ట్రగుల్ అవుతోంది. ఈ దశలో ప్రత్యేక గీతాలు చేస్తే, ఆమెపై ఆ ముద్ర పడిపోతుందన్న భయం ఉంది. అందుకే ఇటీవల ఐటెమ్ గీతాల ఆఫర్లు వస్తుంటే.. నిర్మొహమాటంగా ‘నో’ చెప్పేస్తోంది. అలా చిరు సినిమానీ వదులుకోవాల్సివచ్చిందని తెలుస్తోంది.
‘యానిమల్’ భామ త్రిప్తిని సైతం ఈ పాట కోసం సంప్రదించారు. అయితే త్రిప్తి ప్రస్తుతం ఫుల్ బిజీలో ఉంది. తన డేట్లు అందుబాటులో లేవు. దాంతో ఈ ఐటెమ్ గీతం ముందుకు వెళ్లడం లేదు. ఈ నెలాఖరులోగా కథానాయిక అన్వేషణ పూర్తవ్వాలి. సెప్టెంబరు మొదటి వారంలో ఈ పాటని తెరకెక్కించాల్సివుంది. అందుకే చిత్రబృందం మొత్తం కథానాయిక వేటలో ఉంది. ప్రస్తుతం ఈ చిత్రానికి సంబంధించిన షూటింగ్ అన్నపూర్ణ స్టూడియోలో జరుగుతోంది. ఈనెల 22న చిరంజీవి పుట్టిన రోజు సందర్భంగా ‘విశ్వంభర’ టీజర్ని విడుదల చేయనునున్నారు.
