నందమూరి బాలకృష్ణకు కథలు వినిపించడం, ఆయనతో సినిమా ఓకే చేయించుకోవడం చాలా సులభమైన విషయాలు. కానీ ఆయనకు తగిన కథానాయికని పట్టుకోవడానికి మాత్రం తల ప్రాణం తోకకు వస్తుంటుంది. బాలయ్యకి ఎప్పటి నుంచో కథానాయికల కొరత ఉంది. బాలయ్యకు భయపడతారో, లేదంటే.. నిజంగానే డేట్లు సెట్ కావో తెలీదు గానీ – కథానాయికల అన్వేషణ ఓ విక్రమార్క ప్రయత్నంలా సాగుతూనే ఉంటుంది.
తాజాగా బాలయ్యకు మరోసారి కథానాయికల కొరత ఎదురైంది. గోపీచంద్ మలినేనితో బాలయ్య ఓ సినిమా చేయబోతున్న సంగతి తెలిసిందే. ఇందులో ఇద్దరు కథానాయికలుంటారు. త్రిష, మెహరీన్, శ్రుతి… ఇలాంటి పేర్లు పరిశీలనకు వచ్చాయి. అయితే వీళ్లెవరూ హీరోయిన్లు కాదని తేలిపోయింది. ఇప్పుడు సోనాక్షీ పేరు కూడా వినిపిస్తోంది. ఇటీవల చిత్రబృందం సోనాక్షిని సంప్రదించినట్టు.. సోనాక్షి మాత్రం `నో` చెప్పినట్టు సమాచారం అందుతోంది. సౌత్ లో సినిమాలు చేయడానికి బాలీవుడ్ భామలు ఉత్సాహం చూపిస్తున్న వేళ ఇది. పైగా ఇటీవల చిరంజీవి సినిమా కోసం సోనాక్షిని సంప్రదించినట్టు, తాను ఒప్పుకున్నట్టు వార్తలొచ్చాయి. ఈ నేపథ్యంలో బాలయ్యకీ తాను ఓకే అంటుందనుకున్నారు. కానీ.. `నో` అంటూ ఆశ్చర్యపరిచింది. సో.. బాలయ్య కోసం కథానాయికల వేట అనే అంకం.. సీరియల్ లా సాగుతూనే ఉందన్నమాట.
