తెలంగాణ తెలుగుదేశం నేతలు ఎవరైనా నాయకుడు కనిపిస్తాడా అని చకోరా పక్షుల్లా ఎదురు చూస్తున్నారు. వారి ఎదురు చూపులు ఎలా ఉన్నాయంటే.. చివరికి పార్టీ ఆఫీసులో తలసేమియా బాధితుల కోసం ఓ బ్లాడ్ క్యాంప్ను ఏర్పాటు చేస్తే.. దానిని విజయవంతం చేయాలని పిలుపునిస్తే ఇక ఆయనే నాయకుడని చర్చించుకునే వరకూ వెళ్లిపోయింది. ప్రస్తుతం టీటీడీపీలో నారా రోహిత్ అంశం చర్చనీయాశం అవుతోంది. అక్టోబర్ 2 గాంధీ జయంతి సందర్భంగా ఉదయం 11 గంటలకు.. తెలంగాణ తెలుగుదేశం ఆధ్వర్యంలో తలసీమియా బాధితుల కోసం ఓ మెగా బ్లడ్ క్యాంప్ ఏర్పాటు చేశారు. తెలంగాణ తెలుగుదేశం కుటుంబ సభ్యులు అందరూ తగిన కోవిడ్ జాగ్రత్తలు తీసుకుంటూ…. ఈ క్యాంప్ను విజయవంతం చేయాలని వీడియో విడుదల చేశారు.
అంతే.. తెలంగాణ తెలుగుదేశం పగ్గాలు ఆయన అందుకుంటారంటూ కొంత మంది ప్రచారం ప్రారంభించేశారు. నిజానికి నారా రోహిత్ తాను బ్లడ్ బ్యాంక్ ప్రారంభోత్సవానికి వస్తున్నా అని కూడా చెప్పలేదు. టీటీడీపీ ఏర్పాటు చేసిన క్యాంప్ను విజయవంతం చేయమని కోరారు అంతే. దానికి కొంత మంది హడావుడి పడిపోతున్నారు. ప్రస్తుతం టీటీడీపీ నిస్తేజంగా ఉంది. నడిపించే నాయకుడు కరవయ్యాడు. టీ టీడీపీ అధ్యక్షుడిగా ఉన్న ఎల్.రమణ దూకుడుగా లేరు. దాంతో ఆయన నాయకత్వానికి వ్యతిరేకంగా కొంతమంది లేఖ కూడా రాశారు.
అయితే.. చాలా కాలం నుంచి టీటీడీపీ అధ్యక్ష బాధ్యతల విషయంలో అనేక ప్రచారాలు జరుగుతున్నాయి. జూఎన్టీఆర్ తీసుకుంటారనే దగ్గర్నుంచి ఎన్టీఆర్, నారా కుటుంబసభ్యుల పేర్లు చాలా ప్రచారంలోకి వచ్చాయి. అయితే టీడీపీ అధినేతవైపు నుంచి మాత్రం ఎలాంటి సంకేతాలు రాలేదు. నారా రోహిత్ టీడీపీకి మద్దతుగా చురుగ్గా ఉంటారు కానీ ప్రత్యక్ష రాజకీయాల్లోకి వస్తారని ఎప్పుడూ చెప్పలేదు. ఒక వేళ వచ్చినా తెలంగాణ రాజకీయాల్లో ఎందుకు వేలు పెడతారు..?ఈ లాజిక్నుమాత్రం కొంత మంది మిస్సయ్యారు.
