ఫలక్నామా దాస్.. ఇందులో ఉన్న మేటర్ సంగతేమో గానీ – ఈ సినిమాతో పాపులర్ అయ్యాడు విశ్వక్ సేన్. సినిమా దమ్మెంత? ఎంత వసూలు చేసింది? అనే విషయాల కంటే… ఈ సినిమాకి ముందు, ఆ తరవాత విశ్వక్ సేన్ చేసిన హడావుడి గురించే జనాలు ఎక్కువగా మాట్లాడుకున్నారు. ఇదే ఊపులో `ఫలక్నామా దాస్ 2` కూడా ప్రకటించేశాడు హీరో కమ్ దర్శకుడు. ఓ సినిమా బయటకు వచ్చాక, దాని పబ్లిసిటీ కోసం రకరకాల ప్రామిస్లు చేస్తుంటారు సినీ జనాలు. అందులో సీక్వెల్ తీస్తాం… అని ప్రకటించడం ఒకటి. సీక్వెల్ తీస్తున్నారంటే, ఈ కథలో, సినిమాలో.. ఏదో విషయం ఉండే ఉంటుందని జనాలు అనుకుంటారని, అలా అనుకోవడం వల్ల సినిమాకి వసూళ్లు పెరుగుతాయని కొన్ని కాకి లెక్కలు వేసుకుంటుంటారు. అయితే ఆ రోజులు పోయాయి. ఇదో పబ్లిసిటీ ట్రిక్కు అని జనాలు కూడా ఫిక్సయిపోతున్నారు.
ఫలక్ నామా దాస్ సీక్వెల్ వ్యవహారం కూడా ఇలానే ఉంది. ఈ సినిమాకి పెట్టిన పెట్టుబడి, వచ్చిన వసూళ్లు.. బేరీజు వేసుకుంటే, నిర్మాతలు గట్టెక్కేసినట్టే. నైజాంలో ఈ సినిమా బాగానే వసూళ్లు రాబట్టింది. ఆ మాత్రం దానికే ఈ కథకి, ఈ సినిమాకీ సీక్వెల్ తీద్దామనుకుంటే అది నిర్మాతల అత్సుత్సాహమే అవుతుంది. కథ ప్రకారం చూసుకుంటే సీక్వెల్ ఛాన్స్ లేదు. దాసు అనే పాత్రని కంటిన్యూ చేసి, వేరే కథ అల్లుకుంటే తప్ప సీక్వెల్ చేయలేరు. దీన్ని బట్టి చూస్తే.. ఫలక్ నామా దాస్ 2 అనేది ప్రకటనలకే పరిమితం అనిపిస్తుంది. మరో ముఖ్యమైన విషయం.. విశ్వక్ సేన్ చేతినిండా సినిమాలు చేరాయి. నాని నిర్మాతగా ఓ సినిమా పూర్తి చేయాల్సివుంది. ఎం.ఎస్.రాజు బ్యానర్లో ఓ సినిమా ఉంది. సురేష్ ప్రొడక్షన్స్ సంస్థ కూడా విశ్వక్తో ఓ సినిమా ప్లాన్ చేస్తోంది. హీరోగా బిజీగా ఉన్నప్పుడు ఇలా దర్శకత్వం, నిర్మాణం అంటూ మరో రెండు పడవల మీద ప్రయాణం చేయడం రిస్కే. దీన్ని బట్టి.. ఫలక్ నామా దాస్ 2… రావడం కష్టమే అనిపిస్తోంది.
