లాక్ డౌన్ తరవాత… థియేటర్లు మోతెక్కిపోతున్నాయి. వరుసగా సినిమాలు విడుదల అవుతున్నాయి. ప్రతీ వారం రెండు మూడు సినిమాలైనా గ్యారెంటీ. ఈవారం అయితే… ఏకంగా అరడజను సినిమాలు ప్రేక్షకుల ముందుకు వస్తున్నాయి. అందులో క్రేజ్ ఎన్ని సినిమాలకు ఉందన్న సంగతి పక్కన పెడితే, థియేటర్లు మాత్రం కొత్త పోస్టర్లతో కళకళలాడడం ఖాయం.
నితిన్ `చెక్`పై అందరి గురీ ఉంది. చంద్రశేఖర్ ఏలేటి దర్శకత్వం వహించిన చిత్రమిది. ట్రైలర్ ఆకట్టుకుంది. సినిమాపై అంచనాలు పెంచుతోంది. చంద్రశేఖర్ ఏలేటి సినిమాలంటే ఓ వర్గం ఎప్పటికీ ఆసక్తి చూపిస్తుంటుంది. నితిన్ మంచి ఫామ్ లో ఉన్నాడు. కాబట్టి.. ఈ సినిమాకి మంచి ఓపెనింగ్స్ లభించే అవకాశం పుష్కలంగా ఉంది. ఈ వారమే.. అక్షర, అంగుళీక, క్షణం క్షణం, నువ్విలా నువ్విలా, ఎం.ఎం.ఓ.ఎఫ్ చిత్రాలు విడుదలకు సిద్ధమయ్యాయి. వీటిలో అక్షరకే కాస్త క్రేజ్ ఉందనుకోవాలి. జేడీ చక్రవర్తి నటించిన హారర్, థ్రిల్లర్… ఎం.ఎం.ఓ.ఎఫ్ కూడా ఈ వారం బరిలో నిలిచింది. ఇందులో ఏ సినిమా ప్రేక్షకుల మనసుల్ని గెలుచుకుంటుందో చూడాలి.
