తెలుగు చిత్రసీమ‌లోకి ఎంతోమంది క‌థానాయిక‌లు వ‌స్తుంటారు…. వెళ్తుంటారు. కానీ చాలా త‌క్కువ‌మందే త‌మ‌దైన స్థానాన్ని సంపాదించుకుంటారు. తొలి సినిమాతోనే అంద‌రి మ‌న‌సుల్నీ కొల్ల‌గొట్ట‌డం అంతే తేలికైన విష‌యం కాదు. అలా… ఒక్క సినిమాతోనే టాలీవుడ్ మొత్తాన్ని త‌న వైపు తిప్పుకొంది.. మృణాల్ ఠాకూర్‌. సీతారామంలో సీత‌గా చ‌క్క‌ని అభిన‌యం ప్ర‌ద‌ర్శించి తొలి చూపులోనే అంద‌రికీ ద‌గ్గ‌రైపోయింది. మృణాల్ అందం, ఆహార్యం, ఆ పాత్ర‌లోకి ఒదిగిపోయిన విధానం.. ఇవ‌న్నీ ఇప్పుడు తెలుగు ప్రేక్ష‌కుల్ని మంత్ర ముగ్థుల్ని చేస్తున్నాయి. ఈ సినిమాతో మృణాల్ మ‌రిన్ని అవ‌కాశాలు ద‌క్కించుకోవ‌డం ఖాయంగా క‌నిపిస్తోంది.

నిజానికి తెలుగు ప్రేక్ష‌కుల‌కు మృణాల్ పేరు అస్స‌లు తెలీదు. తాను చేసిన హిందీ సినిమాలు ఒక‌ట్రెండు బాగానే ఆడాయి కానీ, అవేం తెలుగు ప్రేక్ష‌కుల వ‌ర‌కూ రాలేదు. వైజ‌యంతీ మూవీస్ కోరుకుంటే, ఎంత‌టి స్టార్ హీరోయిన్‌ని అయినా, త‌న టీమ్‌లోకి తీసుకుంటుంది. అయితే ఏరి కోరి మృణాల్ ని ఎంపిక చేయ‌డం, సీతారామంలో ర‌ష్మిక ఉన్నా, త‌న‌ని ఓ కీల‌క‌మైన పాత్ర‌కి ప‌రిచ‌యం చేయ‌డం.. ఆశ్చ‌ర్య‌ప‌రిచాయి. ర‌ష్మిక ఉన్న‌ప్ప‌టికీ.. ఓ కొత్త అమ్మాయికి హీరోయిన్ గా స్థానం ఎలా క‌ల్పించారా? అని అంద‌రూ ముక్కున వేలేసుకొన్నారు. అయితే… ఇప్పుడు మృణాల్ త‌న అందంతో, అభిన‌యంతో అంద‌రి అనుమానాల్ని ప‌టాపంచ‌లు చేసింది. సీతగా నూటికి నూరు మార్కులూ సంపాదించుకొంది. దుల్క‌ర్ స‌ల్మాన్‌తో మృణాల్ కెమిస్ట్రీ సీతారామం సినిమాకే హైలెగా మారింది. త్వ‌ర‌లోనే తెలుగు చిత్ర‌సీమ‌లో ఓ అగ్ర క‌థానాయిక‌గా చ‌లామ‌ణీ అయ్యే అన్ని లక్ష‌ణాలూ ఆమెలో క‌నిపిస్తున్నాయ‌ని అప్పుడే అంద‌రూ ఓ అంచ‌నాకు వ‌చ్చేశారు. మ‌రి ఈ విజ‌యాన్ని మృణాల్ ఎంత వ‌ర‌కూ నిల‌బెట్టుకుంటుందో చూడాలి.