డ్రగ్స్ కేసు కొత్త మలుపు తీసుకొంటోందా?? మరికొంతమంది సినీ ప్రముఖుల పేర్లు బయటకు రాబోతున్నాయా?? అవుననే అనిపిస్తోంది. సిట్ అధికారుల నుంచి అందిన విశ్వసనీయ సమాచారం ప్రకారం… రెండో జాబితా ఈ వారంలోనే విడుదల చేయబోతున్నార్ట. ఈసారి మరింత మంది సినీ సెలబ్రెటీల పేర్లు బయటకు వచ్చే అవకాశం ఉందని తెలుస్తోంది. తొలి రోజు సిట్ అధికారులు పూరి జగన్నాథ్ని విచారించిన సంగతి తెలిసిందే. పూరి ఇన్వెస్టిగేషన్లో సిట్ అధికారులకు ఎలాంటి కొత్త సమాచారమూ అందలేదని, శ్యాంకెనాయుడు, సుబ్బరాజు విచారణలో భాగంగా కొత్త విషయాలు తెలిశాయని, ఇప్పటి వరకూ సిట్ అధికారులకు కూడా తెలియని పేర్లు బయటకు వచ్చాయని, ఇప్పుడు సిట్ అధికారులు వాళ్ల జాతకాల్ని బయటపెట్టే పనిలో ఉన్నారని సమాచారం.
సిట్ దగ్గర మరో జాబితా సిద్ధంగా ఉంది. అందులోనూ దిమ్మతిరిగే సెలబ్రెటీల పేర్లు ఉన్నాయట. అయితే.. సిట్ కేవలం సినిమా వాళ్లనే టార్గెట్ చేస్తుందన్న అభిప్రాయం రాకూడదన్న ఉద్దేశంతో ఆ రెండో జాబితా ఇంకా విడుదల చేయలేదని తెలుస్తోంది. ఈలోగా కొంతమంది రాజకీయ నాయకులు, వ్యాపార వేత్తల తనయుల పేర్లు బయటపెట్టి, ఆ తరవాత.. మరికొంతమంది సినిమావాళ్లని బయటకు లాగుతారని తెలుస్తోంది. సుబ్బరాజు ని సిట్ కాస్త టేక్ ఇట్ ఈజీగా తీసుకొందని, అయితే… అసలు సమాచారం అంతా సుబ్బరాజే అందించాడని, ఆ సమాచారంతోనే కొత్త పేర్లు వెలుగులోకి వచ్చాయని తెలుస్తోంది. సో… ఇప్పుడు పూరి నుంచి సిట్ అధికారుల దృష్టి సుబ్బరాజువైపు మళ్లాయి. 12 మంది జాబితా పూర్తయిన తరవాత సుబ్బరాజుని మళ్లీ విచారణకు పిలిచే అవకాశం ఉందని తెలుస్తోంది.
