పాటల సీడీలు ఆవిష్కరణ అన్నది చాలా పాత మాట అయిపోయింది. ఒక్కో పాటనీ విడుదల చేసి, శ్రోతలకు చేరువ అవ్వాలని చూస్తోంది చిత్రబృందం. లిరికల్ వీడియోలు విడుదల చేయడం.. ఇప్పుడు ఓ ట్రెండ్. అయితే.. అది కూడా మరీ రొటీన్ వ్యవహారాల్లా తయారైపోతుంది. సినిమా పోస్టర్లు, దాని కింద సాహిత్యాన్ని టైప్ చేయడం.. ఇదే తంతు. అయితే ఈమధ్య రిలికల్ వీడియోలు కూడా కొత్తగా ట్రై చేస్తున్నారు. `అల.. వైకుంఠపురములో` కోసం గాయనీ, గాయకుల్నీ, మ్యుజీషియన్స్ ని తీసుకొచ్చి పాటల్ని పాడించి, దాన్నో వీడియోగా విడుదల చేశారు. మంచి ఆదరణ లభించింది.
ఇప్పుడు సందీప్ కిషన్ `ఏ 1 ఎక్స్ప్రెస్` నుంచి తొలి పాట విడుదలైంది. `సింగిల్ కింగులం` అంటూ సాగే ఈ పాటని సందీప్, లావణ్య త్రిపాఠీలపై తెరకెక్కించారు. పెళ్లి నేపథ్యంలో సాగే పాట ఇది. లిరికల్ వీడియో వెరైటీగా ఉంది. సెల్ఫోన్, వాట్సప్, ఇన్స్ట్రా, అందులోని మెసేజీలను వాడుకుంటూ బాగా డిజైన్ చేశారు. సామ్రాట్ అందించిన సాహిత్యం కూడా గమ్మత్తుగా ఉంది. ప్రేయసికి ప్రియుడు చేసే వెరైటీ వాగ్దానాలు ఫన్నీగా ఉన్నాయి. రాహుల్ సిప్లిగంజ్ గొంతు మాస్ టచ్తో సాగింది. మొత్తానికి మంచి పాటతో ప్రమోషన్ ప్రక్రియ ప్రారంభించారు. వేసవికి ఈ చిత్రం విడుదల కానుంది.
