పవన్ కల్యాణ్ ‘ఓజీ’ లో మరో సెంట్రాఫ్ అట్రాక్షన్ చేరింది. ఈ సినిమా కోసం తమిళ నటుడు, గాయకుడు శింబు ఓ పాట పాడేశారు. ఈ పాటని తమన్ సంగీత సారథ్యంలో రికార్డ్ కూడా చేసేశారు. ఈ పాట… పవన్ ఫ్యాన్స్ కు పూనకాలు తెప్పించేలా ఉంటుందని టాక్. త్వరలోనే ఈ పాటని రిలీజ్ చేయబోతున్నారు. నిజానికి ‘ఓజీ’లో పాటలకు స్కోప్ చాలా తక్కువని సమాచారం. ఈ సినిమాలో అన్నీ బ్యాక్ గ్రౌండ్ స్కోర్ లో వినిపించే పాటలే. టీజర్ లో వినిపించిన పాట.. ఇప్పటికే పవన్ ఫ్యాన్స్ ని ఉర్రూతలూగిస్తోంది. శింబు పాట దాన్ని మించి ఉండబోతోందని ఇన్ సైడ్ వర్గాలు చెబుతున్నాయి.
రాజకీయాలకు పవన్ స్వల్ప విరామం ఇచ్చి, సినిమాలపై ఫోకస్ చేయబోతున్నాడు. ‘హరి హర వీరమల్లు’లో ఓ యుద్ధ ఘట్టాన్ని తెరకెక్కిస్తున్నారు. ఇందులో పవన్ పాల్గొనబోతున్నారు. `ఓజీ`, ‘ఉస్తాద్ భగత్సింగ్’కు సంబంధించిన షూటింగ్ కూడా త్వరలోనే ప్రారంభం కానుంది. ఈ దసరాకు పవన్ సినిమాల నుంచి ఓ కీలకమైన అప్ డేట్ రాబోతోందని సమాచారం. అది ‘ఓజీ’ లోని శింబు పాటకు సంబంధించి ఉండబోతోందని తెలుస్తోంది. మొత్తానికి ఇక నుంచి సందర్భానుసారం పవన్ సినిమాల నుంచి ఒక్కొక్క అప్ డేట్ వదలడానికి దర్శక నిర్మాతలు తమ తమ సన్నాహాలు చేసుకొంటున్నారు.
