‘డీజే టిల్లు’తో సూప‌ర్ హిట్ కొట్టి, యంగ్ హీరోల రేసులోకి ముందుకొచ్చాడు సిద్దు జొన్న‌ల‌గ‌డ్డ‌. త‌న నుంచి ఓ ప్రాజెక్ట్ వ‌స్తోందంటే.. అంద‌రి దృష్టీ అటువైపే ప‌డుతోంది. ‘టిల్లు’ సీక్వెల్ ‘టిల్లు స్క్వేర్‌’ విడుద‌ల‌కు రెడీగా ఉంది. ఈలోగా మ‌రో ప్రాజెక్ట్ ని సెట్ చేసేశాడు. ‘బొమ్మ‌రిల్లు’ భాస్క‌ర్ ద‌ర్శ‌క‌త్వంలో సిద్దు హీరోగా ఇటీవ‌లే ఓ సినిమా ప‌ట్టాలెక్కింది. బి.వి.ఎస్‌.ఎన్‌.ప్ర‌సాద్ నిర్మాత‌. ‘బేబీ’తో ఆక‌ట్టుకొన్న వైష్ణ‌వి హీరోయిన్‌. ఈ చిత్రానికి ‘జాక్‌’ అనే టైటిల్ ఫిక్స్ చేసిన‌ట్టు తెలుస్తోంది. రేపు చిత్ర‌బృందం అధికారికంగా ఈ టైటిల్ ని ప్ర‌క‌టించే అవ‌కాశాలు ఉన్నాయి. ‘బొమ్మ‌రిల్లు’ భాస్క‌ర్ అన‌గానే కుటుంబ క‌థా చిత్రాలు, ల‌వ్ స్టోరీలు గుర్తొస్తాయి. అయితే ఈ సినిమా మాత్రం వాటికి భిన్నంగా ఉండ‌బోతోంద‌ని తెలుస్తోంది. ఫ‌న్ తో పాటు క్రైమ్ ఎలిమెంట్స్ కూడా ఈ క‌థ‌లో మేళ‌వించిన‌ట్టు స‌మాచారం.