గ్రామ, వార్డు సచివాలయ ఉద్యోగులకు ఈ నెల కూడా పాత జీతమే వచ్చింది. పెరిగిన జీతం వచ్చే నెల నుంచి వస్తుందేమోనని ఆశ పడుతున్నారు. అయితే ప్రొబేషన్ ఖరారు చేసినా వారి వద్ద నుంచి కోట్లు వసూలు చేయడానికి ప్రభుత్వం స్కెచ్ వేసింది. ఆ డబ్బులు ప్రభుత్వానికి బాకీ ఉన్నారని చెల్లిస్తేనే ప్రొబేషన్ ఖరారు చేస్తామని చెబుతోంది. కానీ అలాంటి బాకీలేమి లేమని గ్రామ, వార్డు సచివాయ ఉద్యోగులు అంటున్నారు.
గత ప్రభుత్వాలు ఎప్పుడో ఇచ్చిన ఇళ్లకు ఇప్పుడు డబ్బులు వసూలు చేయాలనుకుంది ఏపీ ప్రభుత్వం. అందుకు ఓటీఎస్ అనే స్కీమ్ పెట్టింది. వాటిపై రోజువారీ టార్గెట్లు పెట్టి గ్రామ, వార్డు సచివాలయ ఉద్యోగులకు బాధ్యతలు ఇచ్చింది. ఈ టార్గెట్లకు తాళ లేక.. వారు చాలా మంది లబ్దిదారుల నుంచి తర్వాత ఇస్తామనో.. మరో ప్రామిసరి నోటో రాయించి.. వారు ఓటీఎస్ కట్టినట్లుగా రికార్డుల్లో నమోదు చేశారు. కానీ వారు చెల్లించలేదు. అలా పేరుకుపోయిన సొమ్ము ఎనభై కోట్లకుపైగానే ఉంది. నిజానికి అది లబ్దిదారులు కట్టింది కాదు… కానీ కట్టినట్లుగా రాశారు. అయితే రికార్డుల్లో కట్టినట్లుగా ఉంది.. ఆ సొమ్ము ఖజానాకు జమ కాలేదు కాబట్టి ఎప్పటి పరిస్థితుల్లో ఇవ్వాల్సిందేనని ప్రభుత్వం చెబుతోంది.
ఆ సొమ్ము ఎవరి వద్ద పెండింగ్లో ఉందో.. వారి ప్రొబేషన్లను ప్రభుత్వం నిలిపివేసింది. ఆ డబ్బులు కట్టాలని ఒత్తిడి తెస్తోంది., కొంత మంది ఇలా పెండింగ్ బకాయిలు లక్షల్లో ఉన్నట్లుగా ఉండటంతో చాలా మంది టెన్షన్కు గురవుతున్నారు. కట్టకపోయినా కట్టినట్లుగా రికార్డు చేసుకోమని ఒత్తిడి చేసిన పై అధికారులను.. స్థానిక వైసీపీ నేతలను వారు గట్టెక్కించమని వేడుకుంటున్నారు. కానీ వారు పట్టించుకోవడం లేదు.
మరో వైపు ఎవరూ నోరెత్తకుండా కఠిన చర్యలను ప్రభుత్వం తీసుకుంటోంది. నిరసనకు దిగిన వారి ప్రొబేషన్ రద్దు చేస్తామని గతంలో రోడ్డెక్కిన వారి పేర్లను కలెక్టర్లకు పంపింది. దీంతో ఇప్పుడు నోరెత్తలేని పరిస్థితికి మిగతావారు వెళ్లిపోయారు. ప్రభుత్వాన్ని నమ్మిదారుణంగా మోసపోయామని వారు ఆవేదన చెందుతున్నారు.
