భలే మంచి రోజు సినిమాతో ఆకట్టుకొన్నాడు శ్రీరామ్ ఆదిత్య. ఇప్పుడు నలుగురు హీరోలతో ‘శమంతకమణి’ తీస్తున్నాడు. టైటిల్ వినగానే.. ఇదేదో క్రైమ్ + థ్రిల్లర్ సినిమా అనేది అర్థమైపోతోంది. ట్రైలర్ చూస్తే… ‘అవును.. అది నిజమే’ అనిపించేలా ఉంది. నారా రోహిత్, ఆది, సందీప్ కిషన్, సుధీర్బాబు నటించిన సినిమా ఇది. ఆ నాలుగు పాత్రలు, వాళ్ల లక్ష్యం, సింపుల్గా కథ చెబుతూ.. ట్రైలర్ని కట్ చేశారు. ఉత్కంఠ రేపే సన్నివేశాలు ఈ సినిమాలో ఉన్నాయన్న సంగతి ట్రైలర్ చూస్తే అర్థం అవుతోంది. రాజేంద్రుడు కూడా ఉన్నాడు కాబట్టి.. కామెడీకి కొదవ లేదు.
టేకింగ్, ట్రైలర్ని కట్ చేసిన విధానం… ఈ సినిమాపై హోప్స్ పెంచేలా చేస్తున్నాయి. హైదరాబాద్లోని ఖరదీదైన రెస్టారెంట్.. అక్కడో పార్టీ… 5 కోట్ల ఖరీదైన కారు.. ఇదీ టోటల్గా శమంతకమణి స్టోరీ. ‘శమంతకమణి’ అంటే కారు అనే విషయం ముందే చెప్పేశారు. మొత్తానికి ట్రైలర్ ఆసక్తికరంగానే ఉంది. జులై రెండో వారంలో ఈ చిత్రాన్ని విడుదల చేస్తున్నారు. ఈ మల్టీస్టారర్ థ్రిల్లర్ ఎలాంటి ఫలితాన్ని సాధిస్తుందో చూడాలి.
