ద‌ర్శ‌కుడు శివ నిర్వాణ క‌థ‌లే కాదు, పాటలూ మ‌న‌సుని హ‌త్తుకొనేలా ఉంటాయి. త‌న సినిమాలోని పాట‌ల‌న్నీ హిట్టే. ఖుషి సినిమాలో కూడా సౌండింగ్ బాగుంది. విజ‌య్ దేవ‌ర‌కొండ – స‌మంత జంట‌గా న‌టిస్తున్న సినిమా ఇది. ఈ చిత్రంలోని తొలి పాట ‘నా రోజా నువ్వే’ విడుద‌లై.. స్లో పాయిజ‌న్‌లా ఎక్కేసింది. ఇప్పుడు ‘ఆరాధ్య‌..’ అనే మ‌రో పాట‌ని విడుద‌ల చేశారు. ఇది కూడా.. మెలోడీ గీత‌మే. హీరో, హీరోయిన్ల మ‌ధ్య ప్రేమ‌ని, వాళ్ల అనుబంధాన్నీ, ఒక‌రిపై ఒక‌రికి ఉండే ఇష్టాన్నీ.. ఈ పాట‌లో చూపించారు. విజ‌య్ – సంమంతల కెమిస్ట్రీ బాగుంది. మాంటేజ్ సీన్లు కూడా చాలా ఫ్రెష్‌గా ఉన్నాయి. ఈ పాట కూడా.. శివ నిర్వాణే రాశాడు. త‌న ప‌దాలు సింపుల్‌గా, విన‌సొంపుగా ఉన్నాయి. ఇక సంగీత ద‌ర్శ‌కుడు ‘హృద‌యం’ ఫేమ్ అబ్దుల్ వాహ‌బ్ గురించి చెప్పుకోవాలి. మ‌రోసారి ఆక‌ట్టుకొనే ట్యూన్ ఇచ్చాడు. `నా రోజా నువ్వే`లా.. ఈ పాట కూడా స్లో పాయిజ‌న్‌లా ఎక్కేసేలా ఉంది. ‘ఖుషి’ ఓ ల‌వ్ స్టోరీ. ప్రేమ‌క‌థ‌ల‌కు పాట‌లే ప్రాణం. రెండు పాట‌ల‌తోనూ శివ నిర్వాణ మంచి మార్కులే కొట్టేశాడు. ఇంకా ఈ సినిమాలోని మూడు పాట‌లు రావాల్సివుంది. అందులో మ‌రొక్క పాట హిట్ట‌యినా ఆల్బ‌మ్ ప‌రంగా ఖుషి స‌క్సెస్ అయిపోయిన‌ట్టే.