సత్యదేవ్ హీరో తెరకెక్కిన సినిమా గాడ్సే. ఐశ్వర్య లక్ష్మి హీరోయిన్. గోపీ గణేష్ దర్శకుడు. ఈ సినిమా టీజర్ బయటికి వచ్చింది. ‘ఏ నినాదం వెనుక ఎవరి ప్రయోజనం దాగుందో తెలుసుకోలేనంత కాలం ప్రజలు మోసపోతూనే వుంటారు” అనే వాయిస్ తో టీజర్ మొదలైయింది. టీజర్ లో చాలా యాక్షన్ చూపించారు. గాడ్సే పాత్ర వరుసగా కాల్పులు జరపడం, గాడ్సేని పట్టుకునే మిషన్ లో ఐశ్వర్య లక్ష్మి ఆఫీసర్ గా కనిపించడం, రాజకీయ నాయకుడిగా పృద్వీ డైలాగు.. నాజర్, బ్రహ్మాజీ, ఆదిత్య మీనన్, తనికెళ్ళ భరణి.. స్టార్ కాస్ట్ అంతా టీజర్ లో కనిపించడం, చివర్లో గాడ్సే చెప్పిన డైలాగు ఇంట్రస్టింగ్ గా వున్నాయి.
‘ఉద్యోగం చేస్తే డబ్బులు వస్తాయి, వ్యాపారం చేస్తే డబ్బులు వస్తాయి.. వ్యవసాయం చేస్తే డబ్బులు వస్తాయి.. కానీ సేవ చేస్తే వేల, లక్షల కోట్లు ఎలా వస్తాయి ? ఎందుకంటే రాజకీయ నాయకులంతా ప్రజల డబ్బుని సేవ పేరుతో లూటీ చేస్తున్నారు” అని టీజర్ చివర్లో గాడ్సే పాత్ర చెప్పడంతో అవినీతిపై పోరాటమనే గాడ్సే థీమ్ ని కూడా టీజర్ లో రివిల్ చేశారు. అన్నట్టు.. ఇంతకుముందు సత్యదేవ్ తో ‘బ్లఫ్ మాస్టర్’ సినిమా తీశాడు గోపీ గణేష్. ఆ సినిమాలో సత్యదేవ్ పాత్ర ఛాయలు కూడా గాడ్సే టీజర్ లో కనిపించాయి. ‘బ్లఫ్ మాస్టర్’ మంచి సినిమానే. పూరి జగన్నాధ్ స్టయిల్ లో దూసుకుపోయే డైలాగులు, స్క్రీన్ ప్లే వుంటుంది. ఇప్పుడు మళ్ళీ ఈ ఇద్దరు గాడ్సే తో వస్తున్నారు. చిత్రానికి సి.కళ్యాణ్ నిర్మాత.
