ప్ర‌భాస్ – మారుతి కాంబినేష‌న్‌లో ఓ సినిమా రూపుదిద్దుకుంటున్న సంగ‌తి తెలిసిందే. ఈ చిత్రంలో బాలీవుడ్ స్టార్ సంజ‌య్‌ద‌త్ ఓ కీల‌క పాత్ర పోషిస్తున్నారు. ప్ర‌భాస్‌కి తాత‌య్య‌గా సంజ‌య్ ఎంట్రీ ఇవ్వ‌బోతున్నాడు. కేజీఎఫ్ 2 త‌ర‌వాత‌.. సంజూ చేస్తున్న తొలి సౌత్ ఇండియ‌న్ సినిమా ఇదే. తెలుగులో `చంద్ర‌లేఖ‌`లో గెస్ట్ ఎప్పీరియ‌న్స్ ఇచ్చాడు సంజూ. ఆ త‌ర‌వాత‌… ఇటువైపే చూడ‌లేదు. మారుతి సినిమాతో మ‌ళ్లీ సంజ‌య్‌ద‌త్ ని తెలుగులో చూసే అవ‌కాశం ద‌క్కింది. ఈ సినిమాలో సంజూది ప్రామినెంట్ రోల్ అని తెలుస్తోంది. క‌థంతా ఆయ‌న చుట్టూనే తిరుగుతుంద‌ట‌. సంజూ కూడా ఈ సినిమాకి బ‌ల్క్ గా డేట్లు కేటాయించిన‌ట్టు స‌మాచారం. సంజ‌య్ ద‌త్ – ప్ర‌భాస్ సీన్ల‌ని జూన్‌లో పూర్తి చేస్తార‌ని తెలుస్తోంది. ఈ సినిమాకి సంబంధించిన ఓ వ‌ర్కింగ్ స్టిల్ ఒక‌టి ఈమ‌ధ్య బ‌య‌ట‌కు లీక్ అయ్యింది. అందులో ప్ర‌భాస్ గెట‌ప్‌, స్టైల్‌.. ఫ్యాన్స్‌కి తెగ న‌చ్చేశాయి. వింటేజ్ ప్ర‌భాస్ ని చూస్తున్న‌ట్టుంద‌ని రెబ‌ల్ స్టార్ ఫ్యాన్స్ హ్యాపీ ఫీల‌వుతున్నారు. త్వ‌ర‌లోనే టైటిల్ తో పాటు, ఫ‌స్ట్ లుక్ రివీల్ చేస్తారు.