దేశమంతా ఆసక్తిగా ఎదురు చూస్తున్న సీక్వెల్.. కేజీఎఫ్ 2. తొలి భాగం ఎలాంటి అంచనాలు లేకుండా వచ్చి, సంచలనాలు రేపింది. రెండో భాగంలో స్టార్స్ ఎక్కువయ్యారు. బడ్జెట్లూ పెరిగాయి. దాంతో పాటు అంచనాలు కూడా. కేజీఎఫ్ 2 నుంచి చిన్న అప్ డేట్ వచ్చినా సోషల్ మీడియా ఊగిపోతోంది. ఈరోజు సంజయ్ దత్ పుట్టినరోజు. ఈ సందర్భంగా కేజీఎఫ్ 2 నుంచి సంజయ్ దత్ లుక్ బయటకు వచ్చింది. అధిరగా సంజయ్ని పరిచయం చేసింది చిత్రబృందం. అధిరగా సంజయ్ లుక్… అదిరిపోయింది. అధిర ఎంత క్రూరుడో.. ఈ లుక్లోనే చెప్పేసింది చిత్రబృందం. సంజయ్ రాకతో.. ఈ సినిమాకి కొత్త బలం వచ్చి చేరినట్టైంది. ఇది వరకే సంజయ్ పై కొన్ని సన్నివేశాలు తెరకెక్కించాడు ప్రశాంత్ నీల్. త్వరలోనే ఓ భారీ యాక్షన్ ఘట్టాన్నిరూపొందిస్తాడట. అందుకోసం కసరత్తులు జరుగుతున్నాయి. కేజీఎఫ్ లోని ప్రతీ యాక్షన్ ఘట్టం… అత్యంత భారీగానే ఉంటుంది. వందలాది మంది శత్రువుల్ని రాకీ ఒక్కడే చీల్చి చెండాడుతాడు. ఓ ఫైట్ అంటే… కనీసం రెండొందలమందైనా ఉండాలి. ప్రస్తుతం అలాంటి సన్నివేశాల్ని తెరకెక్కించడం సాధ్యం కాదు. అందుకే పరిస్థితులు చక్కబడే వరకూ యాక్షన్ జోలికి పోకూడదని చిత్రబృందం భావిస్తోంది.
కేజీఎఫ్ 2: అధిర ఆగమనం
