ఆంధ్రప్రదేశ్లో క్రీడా దినోత్సవాన్ని కొత్త ప్రభుత్వం వైరల్గా జరుపుకుంది. మంత్రి అవంతి శ్రీనివాస్.. క్రీడా దినోత్సవం సందర్భంగా… వైఎస్సార్ క్రీడా ప్రోత్సాహకాలు పేరుతో.. ఓ కార్యక్రమాన్ని విశాఖలో నిర్వహించాలని తలపెట్టారు. ఘనంగా ఏర్పాట్లు చేశారు. ఈ క్రమంలో… ప్రసిద్ధ క్రీడాకారులతో ఫోటోలతో ఫ్లెక్సీలు ముద్రించారు. ఫోటోలు వేసి వదిలేస్తే..సరిపోయేదేమో.. ఎందుకంటే.. వారందరూ నోటెడే..క్రీడలపై ఆసక్తి ఉన్న ప్రతి ఒక్కరికీ..అందరూ తెలుసు. కానీ.. ఏపీ క్రీడా మంత్రిత్వ శాఖ మంత్రి ఆ మాత్రం చాన్స్ ప్రజలకు ఇవ్వకూడదనుకుంది. ఫోటోలతో పాటు పేర్లను కూడా ముద్రించింది. అలాంటి ఓ ఫోటో… హైలెట్ అయింది.
ఫ్లెక్సీ మీద సానియా మీర్జా ఫోటో వేసి..కింద పీ.టీ.ఉష అని.. ముద్రించారు. ఉదయమే ఈ ఫ్లెక్సీని చూసిన.. విశాఖ వాసులు.. ఫోటోలు తీసి సోషల్ మీడియాలో అప్ లోడ్ చేశారు. అప్పట్నుంచి… ఇక సోషల్ మీడియాలో క్రీడా దినోత్సవం ప్రారంభమయింది. రకరకాల సెటైర్లు, మీమ్స్తో సోషల్ మీడియాను హోరెత్తించారు. సానియా మీర్జాకు, పీటీ ఉషకు తేడా తెలియని… నేతలు మంత్రులు అయితే.. ఇలాగే ఉంటుందని.. సెటైర్లు ప్రారంభించారు. అన్ని రకాల సోషల్ మీడియాల్లోనూ ఇదే వైరల్ అయిపోయింది.
ఈ వ్యవహారంపై.. క్రీడా మంత్రిత్వ శాఖ అధికారులు వెంటనే నాలిక్కర్చుకుని అలాంటి ఫ్లెక్సీలన్నింటినీ తీసేశారు కానీ… అప్పటికే జరగాల్సిన నష్టం జరగిపోయింది. కొత్త ప్రభుత్వంలో తొలి క్రీడాదినోత్సవం… క్రీడా మంత్రికి… చుక్కలు చూపించినట్లయింది. క్రీడలపై ఏ మాత్రం అవగాహన లేకుండా… రికమెండేషన్లతో.. మంత్రి వద్ద చేరిన కొంత మంది.. పెత్తనం తీసుకోవడం వల్లే ఈ సమస్య వచ్చిందనే గుసగుసలు వినిపిస్తున్నాయి. మంత్రి అయినప్పటి నుండి.. అవంతి.. అధికారులను ఎవర్నీ లెక్కచేయడం లేదనే అసంతృప్తి అధికారుల్లో ఉండటంతో.. వారు కూడా…ఇలాంటి విషయాల్లో జోక్యం చేసుకోవడం మానేశారంటున్నారు.
