అర్జున్ రెడ్డి తరవాత సందీప్ రెడ్డి వంగా తో సినిమా చేయాలని చాలామంది స్టార్ హీరోలు భావించారు. అందులో మహేష్ బాబు ఒకడు. మహేష్ – సందీప్ మధ్య చర్చలు కూడా జరిగాయి. వీరిద్దరి కాంబో దాదాపుగా ఖాయమని ప్రచారం కూడా జరిగింది. అయితే ఈ కాంబో ఇక లేనట్టే. సందీప్ రెడ్డితో సినిమా చేయాలన్న ఆలోచన మహేష్ విరమించుకున్నట్టు తెలుస్తోంది. దానికి కారణం.. కథేనట.
సందీప్ చెప్పిన కథ మహేష్కి నచ్చింది గానీ, ద్వితీయార్థంలో కొన్ని అనుమానాలు వ్యక్తం చేసినట్టు టాక్. సందీప్రెడ్డి ది కాస్త మొండి వైఖరి. ఎవరి కోసమో కథ మార్చుకోడు. అర్జున్ రెడ్డి కథని కూడా చాలామంది హీరోలు తిరస్కరించారు. అందులో మార్పులు చేర్పులు చెప్పారు. ఎవరి మాటకూ తలొగ్గక… తాను అనుకున్నది అనుకున్నట్టు తీయడానికి ఆ సినిమా కోసం తానే నిర్మాతగా మారాడు. అందుకే అంతటి సక్సెస్ వచ్చింది. అర్జున్ రెడ్డి హిట్టవ్వడం, అది బాలీవుడ్ లో తెరకెక్కించి దాన్ని కూడా సూపర్ హిట్ చేయడంతో సందీప్ రేంజు మరింత పెరిగింది. ఇలాంటి స్థితిలో హీరో కోసం కథని మార్చేందుకు సందీప్ ఎందుకు ఒప్పుకుంటాడు? అందుకే… ఈ ప్రాజెక్టు నుంచి సందీప్ కూడా తప్పుకున్నాడు. సందీప్తో సినిమా స్థానంలో ప్రశాంత్ నీల్ (కేజీఎఫ్ దర్శకుడు)ని తీసుకొచ్చాడు మహేష్. పైగా ఇప్పుడు సందీప్ కి తెలుగు సినిమాలు చేయాలని కూడా లేదు. తన దృష్టంతా బాలీవుడ్పైనే ఉంది.
