కొన్ని సినిమాలు టైటిల్స్ తోనే ఎట్రాక్ట్ చేస్తాయి. అలాంటి ఓ క్యాచి టైటిల్ ని పట్టుకున్నారు నిర్మాత బెక్కెం వేణుగోపాల్. అదే.. రోటి కపడా రొమాన్స్. హుషారు, సినిమా చూపిస్త మావ, మేం వయసుకు వచ్చాం, ప్రేమ ఇష్క్ కాదల్, పాగల్’ లాంటి మంచి యూత్ ఫుల్ చిత్రాలను నిర్మించిన ట్రాక్ వున్న నిర్మాత ఆయన. ఇప్పుడు విక్రమ్ రెడ్డి దర్శకుడిగా హర్ష నర్రా, సందీప్ సరోజ్, తరుణ్, సుప్రజ్ రంగా లాంటి కొత్త నటీనటులతో ఈ సినిమాని నిర్మించారు.
తాజాగా ఈ సినిమా ట్రైలర్ ని వదిలారు. రోటి కపడా మకాన్ అనేది ఒకప్పటి నినాదం.. రోటి కపడా రొమాన్స్ అన్నది ఇప్పటి యువత నినాదం. ఈ ఒక్క డైలాగ్ తో ఈ సినిమా థీమ్ ని చెప్పే ప్రయత్నం చేశారు. నలుగు కుర్రాళ్ళు, వాళ్ళ ప్రేమలు, బ్రేక్ అప్ లు, జీవితంలో స్థిరపడటం కోసం చేసే పోరాటాలు ఇవన్నీ ఇందులో వున్నాయి. నేటి యువత మనసుకి అద్దంపట్టేలా తీర్చిదిద్దిన కంటెంట్ ఇది. యూత్ కి కనెక్ట్ అయ్యే అంశాలు కనిపించాయి. కొత్త కుర్రాళ్ళు చలాకీగా నటించారు. సంగీతం, కెమరాపనితనం కూడా డీసెంట్ గానే కుదిరాయి. నవంబర్ 22న ఈ సినిమా ప్రేక్షకులు ముందుకు వస్తోంది.
