మణిరత్నం క్లాసిక్ మూవీ `రోజా`. అరవింద్ స్వామి, మధుబాల జంటగా నటించిన ఈ చిత్రం అప్పట్లో ఓ కుదుపు కుదిపేసింది. మణి విజువల్స్, రెహమాన్ సంగీతం ఈ సినిమాకి ప్రధాన బలాలు. అరవింద్ స్వామి, మధుబాల జంట – వాళ్ల కెమిస్ట్రీ యువ హృదయాల్ని గిలిగింతలు పెట్టింది. `రోజా` తరవాత వీరిద్దరూ కలిసి నటించలేదు. ఇన్నాళ్లకు, అంటే 28 ఏళ్ల తరవాత… వీరిద్దరినీ మళ్లీ జంటగా చూడబోతున్నారు.
జయలలిత జీవిత కథ ఆధారంగా తెరకెక్కుతున్న చిత్రం `తలైవి`. విజయ్ దర్శకకుడు. జయలలిత పాత్రలో కంగనా నటిస్తోంది. ఎంజీఆర్ గా… అరవిందస్వామి నటిస్తున్నాడు. ఎంజీఆర్ భార్య జానకీ రామచంద్రన్ పాత్రలో మధుబాలని ఎంచుకున్నారు. అంటే.. ఈ రూపంలో `రోజా` జంటని మరోసారి తెరపై చూడబోతున్నామన్నమాట. `తలైవి`లో చాలా ప్రత్యేకతలున్నాయి. అందులో మరోటి చేరినట్టైంది. అరవింద్ స్వామికి రీ ఎంట్రీలో చాలా మంచి పాత్రలు దక్కుతున్నాయి. మధుబాల కూడా చాలా కాలం క్రిందటే తన సెకండ్ ఇన్నింగ్స్ ప్రారంభించింది. కానీ సరైన పాత్రలు దక్కడం లేదు. ఈ సినిమాతో అయినా క్యారెక్టర్ నటిగా తన కెరీర్ ఊపందుకుంటుందేమో చూడాలి.
