వైఎస్ వివేకానందరెడ్డి హత్య కేసు విషయంలో ఏబీఎన్ ఆంధ్రజ్యోతి ఎండీ వేమూరి రాధాకృష్ణ చాలా కాలంగా తదనైన వాణి వినిపిస్తున్నారు. ఎవరూ ఊహించని విధంగా ఆయన జగన్ సోదరి షర్మిలను ఈ విషయంలో తెరపైకి తెచ్చారు. ఇప్పుడు తన వారాంతపు ఆర్టికల్ “కొత్త పలుకు”లో మరోసారి అదే వాదన వినిపించారు. షర్మిల సాక్ష్యం ఇవ్వడానికి సిద్ధంగా ఉందని.. అయినా సీబీఐ తీసుకోవడం లేదని ఆయన చెబుతున్నారు. ఆర్కే షర్మిల సాక్ష్యం గురించి చెప్పడం ఇదే మొదటి సారి కాదు. గతంలోనూ ఓ “కొత్తపలుకు” లో సీబీఐ అధికారులు షర్మిలను సంప్రదించారని ఆమె కొన్ని కీలక విషయాలు చెప్పారని.. స్టేట్ మెంట్ ఇచ్చేందుకు షర్మిల, తీసుకునేందుకు సీబీఐ అంగీకరిచిందని చెప్పారు. ఇప్పుడు తన వాదనను మరోసారి గుర్తు చేసేలా వ్యాఖ్యలు చేశారు. గతంలో సీబీఐ అధికారుల షర్మిల స్టేట్మెంట్ తీసుకుంటామని చెప్పారని కానీ ఇప్పుడు తీసుకోవడం లేదని అంటున్నారు.
ఓ వైపు సీబీఐ అధికారులపై వైసీపీ నేతలు ఆరోపణలు చేస్తున్నారు. సజ్జల వంటి వారు చంద్రబాబు డైరక్షన్లో సీబీఐ పని చేస్తోందని అంటున్నారు. అయితే ఆర్కే నుంచి దాదాపుగా కాస్త భిన్నమైనా అవే ఆరోపణలు వస్తున్నాయి. ఎవరో సీబీఐపై ఒత్తిడి తెస్తున్నారని అంటున్నారు. అయితే ఆర్కే వాదన భిన్నమైనది. సీబీఐపై ఒత్తిడి తెస్తోంది షర్మిల స్టేట్మెంట్ తీసుకోకుండానట. వివేకానందరెడ్డి హత్యకు గురి కాక ముందు కడప పార్లమెంట్ స్థానం నుంచి అయితే తాను పోటీ చేయాలి లేకపోతే షర్మిల పోటీ చేయాలని ఆన్నారట. అదే విషయాన్ని స్టేట్మెంట్గా ఇవ్వడానికి షర్మిల సిద్ధపడినా సీబీఐ అధికారులు ముందుకు రావడం లేదంటున్నారు ఆర్కే.
ఈ వారం ఆర్టికల్గా ఏపీకి సంబంధించినంత వరకూ పూర్తిగా వివేకా హత్య కేసుపైనే విశ్లేషించారు. వైఎస్ అవినాష్ రెడ్డి, భాస్కర్ రెడ్డే నిందితులని తేలిందని ఆయన పరోక్షంగా నిర్ధారించారు. అయితే వారిని అరెస్ట్ చేస్తారా లేదా అన్నదానిపై ఆయనకు సందేహాలున్నాయి. అందుకే భిన్నమైన వాదన వినిపించారు. మరో వైపు కేసీఆర్ చేస్తున్న బీజేపీ వ్యతిరేక ఫ్రంట్ రాజకీయాలపైనా ఆర్కే తనదైన విశ్లేషణచేశారు కానీ ఆయన చంద్రబాబుతో పోల్చారు. చంద్రబాబు గతంలో ఇలానే చేసి దారుణంగా దెబ్బలు తిన్నారని విశ్లేషించారు.. అయితే కేసీఆర్కు మరో మార్గం లేదంటున్నారు.
అయితే కేసీఆర్కు ఆర్కే పరోక్షంగా చాలా సలహాలిచ్చారు. దానికి కారణాలు కూడా చెప్పారు. ప్రాంతీయ పార్టీలు.. ప్రాంతీయంగా రాజకీయాలు చూసుకుంటేనే ప్రజలు ప్రోత్సహిస్తారు తప్ప.. జాతీయ రాజకీయాల వైపు చూస్తే ప్రజలే కింద పడేస్తారని.. దానికి ఇతర ఉదాహరణలు కూడా చెప్పారు. ఆయన చెప్పినవి కరెక్ట్గానే ఉన్నాయి. అయితే కేసీఆర్ స్టైలే వేరు. మార్చి పదో తేదీన ఐదు రాష్ట్రాల ఎన్నికల ఫలితాలు వస్తాయి. ఆ తర్వాతే జాతీయ రాజకీయాలు.. ప్రాంతీయ పార్టీల రాజకీయం ఎలా ఉంటుందో అప్పుడు తెలుస్తుందని ఆర్కే తేల్చేశారు.
