తెలంగాణ సీఎం రేవంత్ రెడ్డి పెట్టుబడుల సదస్సును నిర్వహిస్తున్నారు. పరిపాలనలోకి వచ్చి రెండేళ్లు అయిన సందర్భంగా ఉత్సవాలు నిర్వహిస్తున్నారు. ముగింపులో భాగంగా ఇన్వెస్టర్ల సమ్మిట్ నిర్వహిస్తున్నారు. ఇందుకోసం భారీ ఏర్పాట్లు చేస్తున్నారు. సాధారణంగా హైదరాబాద్లో ఇన్వెస్టర్ల సమ్మిట్ అంటే.. ప్రపంచ స్థాయి సౌకర్యాలు ఉన్న హైటెక్స్ లేకపోతే.. మరో అదే రేంజ్ కన్వెన్షన్లోనో నిర్వహిస్తారు. కానీ రేవంత్ రెడ్డి మాత్రం ఇంకా నిర్మాణం ప్రారంభం కాని ఫ్యూచర్ సిటీలో ఏర్పాటు చేస్తున్నారు. ఆయన ఆయన కాన్ఫిడెన్స్ అనుకోవచ్చు.
ఫ్యూచర్ సిటీ ప్లాన్లపై నమ్మకం
రేవంత్ రెడ్డి సీఎం అయిన తర్వాత ఫోర్త్ సిటీ కట్టాలని డిసైడయ్యారు. హైదరాబాద్, సికింద్రాబాద్, సైబరాబాద్ ఉన్నాయి..అందుకే నాలుగో సిటీగా.. ఫ్యూచర్ సిటీని ప్లాన్ చేశారు. గతంలో కేసీఆర్ ప్రభుత్వం ఫార్మా సిటీ కోసం సేకరించిన భూములు అందుబాటులో ఉండటంతో వెంటనే ప్రణాళికలు అమలు చేశారు. ఎలాంటి ప్రతిష్టాత్మక సంస్థ వచ్చినా ముందు ఫ్యూచర్ సిటీనే చెప్పేవారు. ఇప్పుడు అక్కడ కొన్ని సంస్థలకు భూముల కేటాయింపులు అయ్యాయి. ఫ్యూచర్ సిటీ డెవలప్మెంట్ అధారాటీ కార్యాలయాన్ని నిర్మిస్తున్నారు. అది సరిపోదని.. నేరుగా ఇన్వెస్ట్మెంట్ సమ్మిట్ ను నిర్వహిస్తున్నారు.
మరో సైబరాబాద్లా మార్చే ప్రయత్నాలు
హైదరాబాద్ మాడు వైపులా పెరిగింది. కానీ శ్రీశైలం హైవే వైపు అనుకున్నంతా పెరగలేదు. అటువైపు నగరాన్ని విస్తరింపచేయడానికి ఫ్యూచర్ సిటీ ప్లాన్లు చాలా బాగా ఉపయోగపడతాయని నమ్మకంగా ఉన్నారు. అందుకే కావాల్సిన మౌలిక సదుపాయాలు కల్పిస్తాం.. అక్కడే పెట్టుబడులు పెట్టాలని అడుగుతున్నారు. 10 సంవత్సరాల్లో ‘న్యూయార్క్’లా మారేలా ఫార్చ్యూన్ 500 కంపెనీలను ఆకర్షించడం, నెట్-జీరో స్మార్ట్ సిటీగా అభివృద్ధి చేస్తామని చెబుతున్నారు. అయితే ఇప్పటి వరకూ భారీ సంస్థల పెట్టుబడుల ప్రకటన రాలేదు. సీఎం సింగరేణి కాలరీస్ ను 10 ఎకరాల్లో కార్పొరేట్ గ్లోబల్ ఆఫీస్ నిర్మించాలని ఆదేశించారు . వాటితో పాటు మరికొన్ని ప్రభుత్వ సంస్థలే కార్యాలయాలు నిర్మించనున్నాయి.
ఇన్వెస్టర్లను ఆకర్షించగలరా ?
ఇంకా గాడినా పడని ఫ్యూచర్ సిటీని రేవంత్ రెడ్డి చూపిస్తూండటం.. పారిశ్రామిక వర్గాలకూ ఆశ్చర్యమే. అక్కడ ఏమీ లేకపోయినా అక్కడే ఘనంగా సదస్సు నిర్వహించి భవిష్యత్ లో అక్కడే ఓ గొప్ప నగరం ఉండబోతోందని ఆయన పారిశ్రామికవేత్తలకు నమ్మకం కలిగించేందుకు సిద్ధమవుతున్నారు. ఈ విషయంలో రేవంత్ సక్సెస్ అయి.. ఫ్యూచర్ సిటీకి దిగ్గజ కంపెనీలు వచ్చేందుకు.. పెట్టుబడులు పెట్టేందుకు ముందుకు వస్తే .. గొప్ప విజయం సాధించినట్లే అనుకోవచ్చు. నగరాల నిర్మాణంలో వివిధ రాష్ట్రాల మధ్య జరుగుతున్న పోటీలో .. రేసులోకి రావొచ్చు.
