తెలంగాణ రాష్ట్ర సమితి అధినేత కేసీఆర్ , ఆయన కుమారుడు కేటీఆర్ ను కార్నర్ చేయడంలో.. టీ కాంగ్రెస్ వర్కింగ్ ప్రెసిడెంట్ రేవంత్ రెడ్డి స్టైల్ వేరుగా ఉంటుంది. తాజాగా… ఎన్నికల ప్రచారంలో.. తాను ఓడిపోతే.. తనకేం నష్టం లేదని.. ఇంట్లో రెస్ట్ తీసుకుంటానన్న కేసీఆర్ వ్యాఖ్యలపై రేవంత్ రెడ్డి అదే విధమైన కౌంటర్ ఇచ్చారు. మరి ప్రతిపక్షంలో ఎవరు ఉంటారని ప్రశ్నించారు. కేసీఆర్, కేటీఆర్ లను . బిల్లారంగాలుగా రేవంత్రెడ్డి అభివర్ణించారు. ఓడిపోతే కేటీఆర్ అమెరికాకు..కేసీఆర్ ఇంటికి పోతానంటున్నారు ..అధికారం లేకపోతే ప్రజలకు సేవచేయరా అని ప్రశ్నించారు. కేసీఆర్ ఆర్థిక నేరగాడు..పారిపోయేందుకు ప్రయత్నిస్తున్నాడని .. వెంటనే రెడ్కార్నర్ నోటీసు జారీ చేసి పాస్పోర్టు సీజ్ చేయాలని డిమాండ్ చేశారు.
మరో వైపు కొడంగల్ ర్యాలీలో… టీఆర్ఎస్ ఓడిపోతే.. రాజకీయ సన్యాసానికి సిద్ధమని.. తన సవాల్ స్వీకరించాలని.. కేటీఆర్ చేసిన ప్రకటనపైనా రేవంత్ అంతే విభిన్నంగా స్పందించారు. అసెంబ్లీ ఎన్నికల్లో నాతో సవాల్ చేసేందుకు కేటీఆర్ ఓనర్ కాదు..పనోడని తీసి పడేశారు. కేటీఆర్కు దమ్ముంటే లోక్సభ ఎన్నికల్లో నాతో పోటీకి సిద్ధపడాలని సవాల్ చేశారు. గతంలో కేసీఆర్ పోటీ చేసిన మహబూబ్నగర్ ఎంపీకి పోటీ చేద్దామన్నారు. చేతనైతే కేటీఆర్ సవాల్ ను స్వీకరించాలని చాలెంజ్ చేశారు. టీడీపీతో పొత్తుపై టీఆర్ఎస్ నేతలు చేస్తున్న విమర్శలను కూడా రేవంత్ తిప్పికొట్టారు. టీడీపీతో కాంగ్రెస్ పొత్తు పెట్టుకుంటే తప్పేంటని ప్రశ్నించారు. చంద్రబాబు అనుకున్నా తెలంగాణ ప్రాజెక్టులను అడ్డుకోలేరని చంద్రబాబుపై నెపం పెట్టి ప్రజలను రెచ్చగొట్టే ప్రయత్నం చేస్తున్నారని మండిపడ్డారు. దృష్టి మళ్లించి దోచుకునే దొంగ కేసీఆర్ అని విరుచుకుపడ్డారు. టీఆర్ఎస్ పై …రేవంత్ మైండ్ గేమ్ కొనసాగిస్తున్నారు. మరికొందరు టీఆర్ఎస్ ఎంపీలు కాంగ్రెస్లోకి వస్తారని.. ఎంపీలే కాదు, ఎమ్మెల్సీలు కూడా వస్తారని కేసీఆర్, కేటీఆర్కు దమ్ముంటే వారిని ఆపుకోమని సవాల్ చేస్తున్నారు.
కేసీఆర్ ఏ ఉద్దేశంతో… ఓడిపోతే విశ్రాంతి తీసుకుంటాననే వ్యాఖ్యలు చేశారో కానీ.. కాంగ్రెస్ పార్టీ నేతలకు జోష్ ఇచ్చినట్లయింది. సోషల్ మీడియాలో.. వాటిని కాంగ్రెస్ నేతలు విస్తృతంగా ప్రచారం చేసుకుంటున్నారు. టీఆర్ఎస్ ఆశలు వదులుకుందన్న అభిప్రాయాన్ని బలంగా ప్రజల్లోకి పంపే ప్రయత్నం చేస్తున్నారు. ఈ విషయంలో టీఆర్ఎస్ కు ఏం చెప్పాలో అర్థం కాని పరిస్థితి ఏర్పడింది.
