కాంగ్రెస్ ప్రభుత్వ మనుగడపై కేటీఆర్ తరచూ చేస్తున్న వ్యాఖ్యలు… పార్టీ నేతలతో అనిపిస్తున్న కామెంట్స్ కు రేవంత్ రెడ్డి వయోలెంట్ కౌంటర్ ఇచ్చారు. రేవంత్ రెడ్డి విదేశీ పర్యట నుంచి రాగానే ఉమ్మడి మెదక్ జిల్లాకు చెందిన నలుగురు ఎమ్మెల్యేలు ఆయనను కలిశారు. అంతకు ముందే వారు ఇంటలిజెన్స్ చీఫ్ శివనాథ్ రెడ్డిని కూడా కలిశారు. తమకు ఏ ఉద్దేశాలు లేవని ఆ తర్వాత ఎమ్మెల్యేలు ప్రకటించారు. కానీ అసలు ఉద్దేశమేంటో వారికీ తెలుసు.
కాంగ్రెస్కు తెలుసు.. బీఆర్ఎస్ నేతలకూ తెలుసు. ఇలా కలిసిన వారిలో కేసీఆర్ కు అత్యంత సన్నిహితుడైన కొత్త ప్రభాకర్ రెడ్డి ఉండటంతో రాబోయే రోజుల్లో పరిస్థితి ఎలా ఉంటుందో .. సిగ్నల్స్ పంపినట్లయిందని అంచనా వేస్తున్నారు. సీఎంగా బాధ్యతలు చేపట్టిన రేవంత్ రెడ్డి మొదటి రోజే ఇంటలిజెన్స్ చీఫ్ ను నియమించుకున్నారు. తనకు ఉన్నది నలుగురు ఎమ్మెల్యేల మెజార్టీనేనని ఆయనకు తెలుసు. ప్రభుత్వాన్ని కాపాడు కోవాలంటే ఏం చేయాలో ఆయన ముందుగానే లెక్కలేసుకున్నారు. మహారాష్ట్రతో పాటు ఇతర ప్రభుత్వాలకు సంబంధించిన కేస్ స్టడీల్ని పరిశీలించిన తరవాత ఇంటలిజెన్స్ ను ముందుగానే కార్యాచరణలోకి దించినట్లుగా తెలుస్తోంది. కేటీఆర్ రేవంత్ రెడ్డిని బెదిరించడానికో లేకపోతే తమ పార్టీ కార్యకర్తలకు భరోసా కల్పించడానికో కానీ.. పదే పదే కాంగ్రెస్ ప్రభుత్వం కూలిపోతుందనే ప్రకటనలు చేస్తూ వస్తున్నారు.
ఈ రాజకీయ వ్యూహం రివర్స్ అవుతుందని ఎక్కువ మందికి తెలుసు. అయినా కేటీఆర్ మాత్రం అదే వ్యూహం బెటరని అనుకుంటున్నారు. ప్రజలు తమను తిరస్కరించాలంటే కేటీఆర్ నమ్మలేక పోతున్నారని… త్వరలోనే తమ ప్రభుత్వం ఏర్పడుతుందని ఆయన అనుకుంటున్నారని అంటున్నారు. పార్లమెంట్ ఎన్నికల ఫలితాల తర్వాత జరగబోయే పరిణామాలతో కేటీఆర్కు క్లారిటీ వస్తుందని కాంగ్రెస్ వర్గాలంటన్నాయి.
