అమెరికాలోని తానా సభల్లో పాల్గొన్న రిటైర్డ్ సీజేఐ చీఫ్ జస్టిస్ చేసిన ప్రసంగం వైరల్ అవుతోంది. మానసిక స్థిమితం లేని వారే జాత్యహంకారపు , కులాహంకారపు ఆలోచనలు చేస్తారని… వ్యాప్తిలోకి తెస్తారని.. . సైకోలే విచ్ఛిన్నాన్ని, విధ్వంసాన్ని కోరుకుంటారన్నారు. కాలచక్రాన్ని వెనక్కి తిప్పాలనుకుంటారని విమర్శించారు. ‘‘నేను.. నా కుటుంబం’’ తప్ప వారికింకేమీ పట్టవని.. కానీ చేసేదంతా సమాజం కోసమే అని నమ్మబలుకుతారన్నారు.

ఇంత చదువులు చదివి, ఇంతింత అనుభవం గడించిన తర్వాత కూడా ఇలాంటి ప్రచారాన్ని నమ్మి వినాశానికి ఊతమిస్తున్నామంటే రాబోయే తరాలు మనల్ని క్షమించవని రిటైర్డ్ సీజేఐ ఎన్వీ రమణ అవేదన వ్యక్తం చేశారు. సైకో తరహా విధ్వంసంపై జాగ్రత్తగా ఉండాలని ప్రవాసులకు పిలుపునిచ్చారు. చరిత్ర నుంచి గుణపాఠాలు నేర్చుకోలేని చరిత్ర హీనులుగా మిగిలిపోతామని గుర్తుంచుకోవాలని సలహా ఇచ్చారు.

ఇంగ్లీషు భాష సర్వరోగ నివారిణి అని నమ్మించే ప్రయత్నాలు పదే పదే జరుగుతూనే ఉంటాయని.. మన వెనుకబాటుతనానికి తెలుగే కారణమని చెప్పే వారూ ఉంటారనన్నారు. నాటి ఆంధ్రప్రదేశ్ ముఖ్యమంత్రి చంద్రబాబు ఆధునిక సాంకేతిక పరిజ్ఞానాన్ని ప్రోత్సహంచడం కారణంగా అమెరికాలో ఆంధ్రులకు అవకాశాలు ఒక్కసారిగా పెరిగాయని గుర్తు చేశారు. ప్రతిభావంతులైన తెలుగు యువతీ, యువకులు ఆ అవకాశాలను అందిపుచ్చుకున్నారని తెలిపారు. ఎందరికో చేయూతనిచ్చారని.. సంపద పెరిగిందని… సంపాదన పెరిగిందని.. వసతులు పెరిగాయన్నారు. స్వదేశంలో తల్లి దండ్రులు, బంధుమిత్రుల జీవన ప్రమాణాలు కూడా పెంచగలిగారని తెలిపారు.

ఎన్టీఆర్‌కు భారతరత్న వచ్చేంత వరకు తెలుగువారంతా విశ్రమించకూడదని ఎన్వీ రమణ పిలుపునిచ్చారు.