సమంత నటించిన ‘జానూ’ ఈమధ్యే విడుదలైంది. సమంత, శర్వాల నటనకు మంచి మార్కులు పడినా, ఈ సినిమా ఫ్లాప్ లిస్టులో చేరిపోయింది. సమంత, శర్వాల కష్టానికి ఎలాంటి ప్రతిఫలం రాలేదు. అయితే ఈ సినిమా రిజల్ట్ విషయంలో రష్మిక హ్యాపీగా ఉంది. ఈ సినిమాకీ రష్మికకీ సంబంధం ఏమిటంటారా..?
నిజానికి ఈ ఆఫర్ రష్మిక దగ్గరకీ వెళ్లింది. ఈ సినిమా చేయాలా, వద్దా? అని సమంత సతమతమవుతున్నప్పుడు దిల్ రాజు దగ్గర మరో ఆప్షన్ రెడీగా ఉంది. తనే… రష్మిక. ’96’ రీమేక్లో నటించమని దిల్ రాజు స్వయంగా రష్మికని అడిగాడు. కానీ… రష్మిక ‘నో’ చెప్పింది. చివరి క్షణాల్లో సమంత ఓకే చెప్పేయడంతో, రష్మిక వద్దన్నా ఈ ప్రాజెక్టు ముందుకెళ్లింది. ‘జానూ’ సినిమా కోసం మిమ్మల్ని సంప్రదించిన మాట నిజమేనా…? అని అడిగితే నవ్వుతూనే సమాధానం దాటేస్తోంది రష్మిక. ”అది అయిపోయిన విషయం కదా.. నేను చెప్పకూడదు. ష్…“ అంటూ కప్పదాటేసింది. అంత మంచి క్యారెక్టర్ వదిలేసినందుకు బాధ పడినా… రిజల్ట్ చూసి ‘వదులుకోవడమే మంచిదైంది’ అని సంతోష పడి ఉంటుంది.
