ఒకప్పుడు యంగ్ హీరోల పక్కన పర్ఫెక్ట్ ఛాయిస్ అనిపించింది రాశీఖన్నా. అందుకే చక చక సినిమాలు చేసేసింది. దక్షిణాదితో పాటుగా హిందీలోనూ మెరిసింది. అయితే కొన్నాళ్లుగా తెలుగు సినిమా రాశీఖన్నాని పట్టించుకోవడం మానేసింది. ముందు పూజా హెగ్డే, ఆ తరవాత శ్రీలీల, కృతిశెట్టి లాంటి హీరోయిన్ల తాకిడికి డల్ అయిపోయింది. అలాగని ఖాళీగా ఏం లేదు. బాలీవుడ్ ప్రాజెక్టులో, వెబ్ సిరీస్ లో చేసుకొంటోంది. తెలుగువాళ్లు మాత్రం సీత కన్నేశారు. ‘పక్కా కమర్షియల్’ తరవాత రాశీఖన్నా తెలుగులో మరో సినిమా చేయలేదు. ‘థ్యాంక్యూ’లో కనిపించింది కానీ అందులో ఆమెను హీరోయిన్ అనలేం. ఆ సినిమా కూడా ఫ్లాపే. నవతరం హీరోయిన్ల జోరు చూశాక.. రాశీఖన్నా లాంటి వాళ్లకు మళ్లీ పిలుపు రావడం కష్టమే అనిపించింది. రాశీఖన్నాని ఇక మర్చిపోవొచ్చు అనుకొంటున్న తరుణంలో.. మళ్లీ ఓ ఛాన్స్ వచ్చింది. నితిన్ సినిమా ‘రాబిన్ వుడ్’ రూపంలో.
నితిన్ కథానాయకుడిగా వెంకీ కుడుముల దర్శకత్వంలో రూపొందుతున్న చిత్రం `రాబిన్వుడ్`. ఇందులో ముందు రష్మికను హీరోయిన్ అనుకొన్నారు. తన స్థానంలో శ్రీలీలని తీసుకొన్నారు. ఇప్పుడు శ్రీలీల ప్లేస్లోకి రాశీఖన్నా వచ్చిందని తెలుస్తోంది. శ్రీలీల, నితిన్ కాంబోలో వచ్చిన ఎక్స్ట్రా సినిమా ఫ్లాప్ అయ్యింది. పైగా శ్రీలీల ఫోకస్ అంతా ఇప్పుడు చదువులపై ఉంది. అందుకే ఆమె స్థానంలో రాశీని ఎంచుకొన్నారని తెలుస్తోంది. చిత్రబృందం మాత్రం అధికారికంగా ప్రకటించలేదు. ఈ చిత్రాన్ని ఈయేడాది డిసెంబరు 20న విడుదల చేస్తామని మేకర్స్ ప్రకటించారు. కొత్త అప్డేట్లోనూ హీరోయిన్ పేరు ప్రస్తావించలేదు. బహుశా.. త్వరలోనే అఫీషియల్గా ఎనౌన్స్ చేస్తారేమో..?
