శివ‌గామి.. ఈ పాత్ర ర‌మ్య‌కృష్ణ‌కు ఎన‌లేని పేరుని తీసుకొచ్చింది. న‌ర‌సింహా త‌ర‌వాత‌.. అంతటి ప‌వ‌ర్‌ఫుల్ రోల్ అది. శివ‌గామిగా ర‌మ్య లుక్స్‌, ఆమె గెట‌ప్ ఆహార్యం, చీర క‌ట్టు అన్నీ ప్రేక్ష‌కుల‌కు గుర్తే. ఇప్పుడు ‘శైల‌జారెడ్డి అల్లుడు’ ఫ‌స్ట్ లుక్ విడుద‌లైంది. ఇందులో శైల‌జా రెడ్డి పాత్ర‌ని ర‌మ్య‌కృష్ణ పోషిస్తున్న సంగ‌తి తెలిసిందే. ఫ‌స్ట్ లుక్‌లో అత్త పాత్ర‌నీ చూపించారు. అత్త‌గా ర‌మ్య‌కృష్ణ‌ని చూస్తే.. శివ‌గామి గెట‌ప్ గుర్తుకు వ‌స్తోంది. ర‌మ్యకృష్ణ చీర‌క‌ట్టు, ఆమె చూపులు.. డిట్టో శివ‌గామినే ఫాలో అయిపోయిన‌ట్టు అనిపించింది. శివ‌గామి హ్యాంగోవ‌ర్ నుంచి ర‌మ్య‌కృష్ణ బ‌య‌ట‌కు రాలేదా? లేదంటే మారుతి బ‌య‌ట‌కు రానివ్వ‌లేదా? అనిపిస్తోంది. లుక్ చూస్తే ఒక్క‌టి మాత్రం స్ప‌ష్ట‌మైంది.. ఇందులో ర‌మ్య‌కృష్ణ ‘పొగ‌రు’న్న అత్త‌గా క‌నిపించ‌బోతోంద‌ని ఖ‌రారైంది. ఇలా ఫ‌స్ట్ లుక్‌లో హీరోనే కాకుండా,. హీరోయిన్‌నీ, అత్త పాత్ర‌నీ చూపించ‌డం అరుదే. క‌థ ఎలాగూ అత్తా అల్లుళ్ల‌ది కాబ‌ట్టి, టైటిల్‌లో శైల‌జా రెడ్డి కూడా ఉంది కాబ‌ట్టి.. మారుతి ఈ నిర్ణ‌యం తీసుకుని ఉంటాడు.