ఒకప్పుడు టాలీవుడ్ దుమ్ము దులిపిన మ్యూజిక్ డైరెక్టర్ రమణ గోగుల. పెప్పీ సాంగ్స్ తో, యూత్ దృష్టిని ఆకర్షించాడు. ముఖ్యంగా పవన్ కల్యాణ్ సినిమా అనగానే రమణ గోగుల గుర్తొచ్చేవాడు. రమణ గోగుల ఆల్ టైమ్ హిట్స్ లలో పవన్ కల్యాణ్ పాటలే ఎక్కువ. పవన్ కు రమణ గోగుల వాయిస్ కూడా అతికినట్టు సరిపోయేది. ఆ కాంబో చాలా కాలం హల్ చల్ చేసింది. అయితే ఆ తరవాత రమణ గోగుల పేరు అస్సలు వినిపించడమే మానేసింది. వరుస ఫ్లాపులు, కొత్త గాయకుల రాకతో.. ఆయన పూర్తిగా వెనకబడిపోయారు. అయితే ఇన్నాళ్లకు మళ్లీ రమణగోగుల పేరు కాస్త గట్టిగా వినిపిస్తోంది.
వెంకటేష్ – అనిల్ రావిపూడి కాంబోలో ‘సంక్రాంతికి వస్తున్నాం’ అనే సినిమా రాబోతోంది. సంక్రాంతికి విడుదల చేయబోతున్నారు. ఈ సినిమాలో రమణ గోగుల ఓ పాట పాడారు. వెంకటేష్ సూపర్ హిట్ సినిమా ‘ప్రేమంటే ఇదేరా’కు రమణ గోగులే సంగీత దర్శకుడు. ఆ సినిమాలో రమణ పాడిన పాటలన్నీ హిట్టే. మళ్లీ ఇన్నాళ్లకు ఈ కాంబో సెట్ అయ్యింది. అయితే ఇప్పుడు ‘ఓజీ’లోనూ రమణ గోగుల ఓ పాట పాడబోతున్నట్టు టాక్. పవన్ సినిమాకు గోగుల పని చేసి చాలా కాలం అయ్యింది. కాబట్టి ఈ పాట సెపరేట్ క్రేజ్ సంపాదించుకొంటుందనడంలో ఎలాంటి సందేహం లేదు. పవన్ – రమణ గోగుల మ్యాజిక్ మళ్లీ రిపీట్ అవ్వాలన్నది అభిమానుల ఆశ. ఈమధ్య కొత్త గొంతులు వినడానికి శ్రోతలు అల్లాడిపోతున్నారు. సిద్ద్ శ్రీరామ్, అనురాగ్ కులకర్ణి పాటలు వినీ వినీ కాస్త బోర్ కొట్టింది. వాటి మధ్య రమణ గోగుల గాత్రం కాస్త ఫ్రెష్గా వినిపించే ఛాన్స్ ఉంది. ఈతరం కుర్రాళ్లకు కూడా ఈ వాయిస్ నచ్చే అవకాశం ఉంది. ఇదే ఊపుతో రమణ గోగుల సినిమాలకు సంగీతం కూడా అందించడానికి పూనుకొంటే – ఇంకొన్నాళ్లు రమణ మ్యూజిక్ ఆస్వాదించే ఛాన్స్ మనకు దక్కుతుంది.
