ధృవ హిట్ తరవాత రామ్ చరణ్కి రీమేక్ సినిమాలపై మమకారం, నమ్మకం పెరిగాయి. పక్క భాషలో ఏదైనా సినిమా హిట్టయితే దానిపై ఫోకస్ పెడుతున్నాడు. ఈమధ్య తమిళ సినిమా ‘హీరో’ తనని బాగా ఆకట్టుకుంది. మిత్రన్ దర్శకత్వం వహించిన సినిమా ఇది. శివ కార్తికేయన్ కథానాయకుడిగా నటించారు. తమిళంలో మంచి విజయాన్ని అందుకుంది. ఈ సినిమాని తెలుగులో రీమేక్ చేస్తే బాగుంటుందని చరణ్ భావించాడు. తమిళ నిర్మాతలతో మాట్లాడాడు కూడా. అయితే అప్పటికే తమిళ నిర్మాతలు తెలుగు డబ్బింగ్ రైట్స్ని మరొకరికి అమ్మేశారు. చరణ్ కోసం.. ఆ సినిమా డబ్బింగ్ కాకుండా ఆపారు.
అయితే.. ఇంతలో ఏమైందో, ఈ సినిమా రీమేక్ చేయకూడదని చరణ్ నిర్ణయించుకున్నాడు. కథ బాగున్నా, తన శైలికి సెట్ అవ్వదని చరణ్ అనుకుంటున్నాడట. అందుకే… ‘హీరో’ కథని పక్కన పెట్టేశాడని తెలుస్తోంది. దాంతో… నిర్మాతలు ఇప్పుడు ఈసినిమాని డబ్బింగ్ చేసి విడుదల చేస్తున్నారు. తెలుగులో ఈ చిత్రానికి ‘శక్తి’ అనే పేరు పెట్టారు. వచ్చే నెలలోనే ఈ డబ్బింగ్ బొమ్మ విడుదల కానుంది.
