బాహుబలితో… రాజమౌళి బాలీవుడ్ మనసుల్ని కూడా గెలుచుకొన్నాడు. రాజమౌళి కథ చెప్పాలే గానీ.. వినడానికి అక్కడి అగ్ర కథానాయకులంతా రెడీనే. అమీర్ఖాన్ సైతం రాజమౌళితో పనిచేయడానికి ఉత్సాహంగా ఉన్నాడు. అయితే రాజమౌళి దృష్టి మాత్రం సల్మాన్ఖాన్ పై పడిందని తెలుస్తోంది. బాహుబలి తరవాత… రాజమౌళి సల్మాన్తో ఓ సినిమా చేయబోతున్నట్టు వార్తలొస్తున్నాయి. అది ఈగకి సీక్వెల్ కావొచ్చని ఫిల్మ్నగర్ వర్గాల సమాచారం.
భజరంగీ భాయ్జాన్కి కథ అందించారు విజయేంద్ర ప్రసాద్. అది సూపర్ డూపర్ హిట్ అయ్యింది. అప్పటి నుంచీ సల్మాన్కీ, విజయేంద్ర ప్రసాద్కీ మంచి రాపో కుదిరింది. ఇప్పుడు ఈగ 2 కథకీ సల్మాన్కి వినిపించారట విజయేంద్ర ప్రసాద్. ఈ కథ వినగానే… సల్మాన్ చాలా ఉత్సాహం చూపించారట. ‘రాజమౌళితో అయితేనే ఈ సినిమా చేస్తా’ అన్నార్ట. రాజమౌళి కూడా బాలీవుడ్లో ఓ సినిమా చేయడానికి ప్లాన్ చేస్తున్నాడు. సల్మాన్ అంతటి వాడే అడిగితే ఎందుకు కాదంటాడు..? కాబట్టి ఈ ప్రపోజల్కి రాజమౌళి కూడా ఓకే అనేసినట్టు టాక్. సో… తెలుగు ఈగ ఇప్పుడు బాలీవుడ్ లో ఎగరబోతోందన్నమాట.
